ടി. പ്രവീണ്
മഞ്ചേരി: കേരളവും കൊല്ക്കത്തയും, ഇന്ത്യന് ഫുട്ബോളിനാകെ കൗതുക പോരാട്ടമാണത്. വിജയവും തോല്വിയും ഇരു ടീമുകളും മാറി സ്വന്തമാക്കുമ്പോള് മൈതാനത്ത് വിരിയുന്നത് അസ്സല് ക്ലാസിക് പോരാട്ടം. സന്തോഷ് ട്രോഫിയില് മഞ്ചേരിയിലും പോരാട്ടത്തിന്റെ ആവേശത്തിന് കുറവുണ്ടായില്ല. മിഴിവേകാന് ഒഴുകിയെത്തിയത് ആയിരങ്ങള്. കാല് ലക്ഷത്തിലധികം പേര് ഗ്യാലറിയില് കേരളത്തിനായി ആര്ത്തുവിളിച്ചു. മലപ്പുറത്തിന് പുറത്തുനിന്ന് പോലും ആരാധകര് ഒഴുകിയെത്തി.
അക്ഷരാര്ത്ഥത്തില് തൃശൂര് പൂരത്തിലെ കുടമാറ്റത്തിന്റെ അന്തരിക്ഷത്തിലേക്ക് മൈതാനം മാറി. മഞ്ഞ ജേഴ്സിയുമായി കേരളവും വെള്ളയണിഞ്ഞ് ബംഗാളും കളത്തില് നിറഞ്ഞാടി. കേരളത്തിന്റെ മണ്ണില് ബംഗാളിനെ തോല്പ്പിക്കുകയെന്നത് അഭിമാനമാണെന്ന് ക്യാപ്റ്റന് ജിജോ ജോസഫ് പറഞ്ഞു. മഞ്ചേരിയിലെ താരമായ അര്ജ്ജുന് ജയരാജ്, ജിജോ എന്നീ പേരുകള് വിളിച്ചാണ് കാണികള് പിന്തുണ കാണിച്ചത്.
