പൊന്‍കുന്നം: ഭര്‍ത്താവിന്റെ വെട്ടേറ്റ് ചികിത്സയില്‍ കഴിഞ്ഞിരുന്ന ഭാര്യ മരിച്ചു. എലിക്കുളം മല്ലികശ്ശേരി കണ്ണമുണ്ടയില്‍ സിനി(44)യാണ് മരിച്ചത്. ഒന്‍പതാം തീയതി രാത്രിയാണ് സംഭവം. ഭര്‍ത്താവ് ബിനോയി ജോസഫിന്റെ വെട്ടേറ്റാണ് സിനിയെ ആശുപത്രിയില്‍ പ്രവേശിപ്പിച്ചത്. ബിനോയി(48)യെ അന്നുതന്നെ പോലീസ് അറസ്റ്റ് ചെയ്തിരുന്നു. ഇയാളിപ്പോള്‍ റിമാന്റിലാണ്.
സിനിയെ ചേര്‍പ്പുങ്കല്‍ മെഡിസിറ്റി ആശുപത്രിയില്‍ സംഭവദിവസം തന്നെ അടിയന്തര ശസ്ത്രക്രിയക്ക് വിധേയയാക്കിയെങ്കിലും ആഴത്തിലുള്ള മുറിവായതിനാല്‍ ആരോഗ്യനില വഷളാവുകയായിരുന്നു.സംശയരോഗം മൂലം ബിനോയി ഭാര്യയുമായി കലഹം പതിവായിരുന്നു. ബിനോയി കറിക്കത്തികൊണ്ട് കഴുത്തിന് വെട്ടുകയായിരുന്നു. തൊട്ടടുത്ത മുറിയിലുണ്ടായിരുന്ന പത്തിലും പന്ത്രണ്ടിലും പഠിക്കുന്ന ആണ്‍മക്കള്‍ ഓടിയെത്തിയപ്പോഴേക്കും സിനി അവശനിലയിലായിരുന്നു. ഇവര്‍ അറിയച്ചതിനെ തുടര്‍ന്ന് അയല്‍വാസികളെത്തിയാണ് ആശുപത്രിയിലാക്കിയത്.
കാഞ്ഞിരപ്പള്ളി ഡിവൈഎസ്പി എന്‍.ബാബുക്കുട്ടന്‍, പൊന്‍കുന്നം പോലീസ് എസ്എച്ച്ഒ സജിന്‍ ലൂയിസ്, എസ്ഐ ടി.ജി.രാജേഷ് തുടങ്ങിയവരുടെ നേതൃത്വത്തിലായിരുന്നു അന്വേഷണം.
പ്രതികരിക്കാൻ ഇവിടെ എഴുതുക: