ന്യൂദല്ഹി: കോപ്പന്ഹേഗനില് നടന്ന ഡാനിഷ് ഓപ്പണ് നീന്തല് ചാമ്പ്യന്ഷിപ്പില് ഇന്ത്യയ്ക്കായി സ്വര്ണം നേടി നടന് മാധവന്റെ മകന് വേദാന്ത്. 800 മീറ്റര് ഫ്രീസ്റ്റൈല് ഇനത്തിലാണ് വേദാന്തിന്റെ നേട്ടം. രാജ്യത്തിനായി മകന് സ്വര്ണം നേടിയ വിവരം മാധവന് സമൂഹമാദ്ധ്യമങ്ങളില് പങ്കുവെച്ചു.
ദൈവത്തിനും പരിശീലകര്ക്കും സ്വിമ്മിംഗ് ഫെഡറേഷനും നന്ദി പറഞ്ഞുകൊണ്ടാണ് മാധവന് ഈ സന്തോഷ വാര്ത്ത സമൂഹമാദ്ധ്യമങ്ങളില് പങ്കുവെച്ചത്. മാധവന്റെ ഭാര്യ സരിതയും മകന്റെ നേട്ടത്തെ കുറിച്ച് ഇന്സ്റ്റഗ്രാമില് വിവരിച്ചിരുന്നു.
കഴിഞ്ഞ ദിവസം നടന്ന മറ്റൊരു മത്സരത്തില് വേദാന്ത് വെള്ളി മെഡലും കരസ്ഥമാക്കിയിരുന്നു. ഇതാദ്യമായല്ല വേദാന്ത് ഇന്ത്യക്കായി മെഡല് നേടുന്നത്. ഇതിന് മുന്പും വേദാന്ത് നീന്തല് കുളത്തില് നേട്ടങ്ങള് കൊയ്തിട്ടുണ്ട്. കഴിഞ്ഞ വര്ഷം ബെംഗളൂരുവില് നടന്ന 47-ാമത് ദേശീയ ജൂനിയര് അക്വാട്ടിക് ചാമ്പ്യന്ഷിപ്പില് മഹാരാഷ്ട്രയ്ക്ക് വേണ്ടി നാല് വെള്ളിയും മൂന്ന് വെങ്കലവുമാണ് വേദാന്ത് സ്വന്തമാക്കിയത്.
