തിരുവനന്തപുരം: സംസ്ഥാന സര്ക്കാരും പോലീസും തീവ്രവാദികള്ക്ക് ആളുകളെ കൊല്ലാനുള്ള സൗകര്യം ചെയ്തു കൊടുക്കുകയാണെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. പോലീസിനു ഗുരുതര വീഴ്ചയുണ്ടായി. ആലപ്പുഴയില് ബിജെപി പ്രവര്ത്തകന് കൊല്ലപ്പെട്ടതുപോലുള്ള സംഭവമാണ് പാലക്കാടും ഉണ്ടായത്. അക്രമം പാലക്കാട് ജില്ല മുഴുവന് വ്യാപിപ്പിക്കാന് പോപ്പുലര്ഫ്രണ്ട് നടത്തിയ ശ്രമങ്ങള് പോലീസ് അവഗണിച്ചു. മേലാമുറി എന്ന സ്ഥലം നേരത്തെ വര്ഗീയ സംഘര്ഷമുണ്ടായ സ്ഥലമാണ്. എന്നിട്ടും പോലീസ് ജാഗ്രത കാണിച്ചില്ലെന്നും അദ്ദേഹം പറഞ്ഞു.
പാലക്കാട് ആര്എസ്എസ് നേതാവ് കൊല്ലപ്പെട്ട സ്ഥലം നേരത്തേ വര്ഗീയ സംഘര്ഷം ഉണ്ടായ സ്ഥലമാണ്. അവിടെ ഒരു പോലീസ് പിക്കറ്റ് ഏര്പ്പെടുത്താനോ ജാഗ്രത പാലിക്കാനോ അധികൃതര് തയാറാകാത്തതാണ് കൊലപാതകത്തിലേക്കു നയിച്ചത്. ഒരു കേസിലും പ്രതിയല്ലാത്ത നിരപരാധിയായ ആര്എസ്എസ് പവര്ത്തകന്റെ മരണത്തിന് കാരണം പോലീസിന്റെ അലംഭാവമാണെന്നും അദ്ദേഹം അറിയിച്ചു.
ആലപ്പുഴയിലും അഭിഭാഷകനായ ബിജെപി നേതാവിനെ പട്ടാപകല് കൊല ചെയ്തത് പോലീസിന്റെ അനാസ്ഥ കാരണമാണ്. ആയുധമേന്തിയ ക്രിമിനലുകള് കേരളമാകെ റോന്ത് ചുറ്റുന്ന കാര്യം അറിഞ്ഞിട്ടും പോലീസ് എന്ത് ചെയ്തു? കേരളത്തില് ക്രമസമാധാന നില തകര്ന്ന് തരിപ്പണമായി കഴിഞ്ഞു. ഭീകരവാദ സംഘടനകള്ക്ക് മുമ്പില് പോലീസ് മുട്ടുമടക്കുകയാണ്. ആഭ്യന്തരവകുപ്പ് സമ്പൂര്ണമായും പരാജയപ്പെട്ടു കഴിഞ്ഞതായും സുരേന്ദ്രന് പറഞ്ഞു.
