പത്തനാപുരം: ചന്ദ്രക്കലച്ചൂടി കഴുത്തില്‍ സ്വര്‍ണ്ണ നാഗവും രുദ്രാക്ഷമാലയും ചാര്‍ത്തി പത്മാസനത്തിനുള്ള ശിവഭഗവാന്റെ മനോഹരശില്‍പം തലവൂരില്‍ അണിഞ്ഞൊരുങ്ങുന്നു. ശില്‍പിയും ചിത്രകാരനുമായ തലവൂര്‍ രണ്ടാലുംമൂട് സ്വദേശി ഷൈന്‍ലാലാണ് തത്തമംഗലം ക്ഷേത്ര സന്നിധിയില്‍ സമര്‍പ്പിക്കാനുള്ള ശില്പമൊരുക്കുന്നത്.
ആറുമാസം മുമ്പ് ആരംഭിച്ച ശില്‍പ നിര്‍മാണം അന്തിമ ഘട്ടത്തിലാണ്. ഏതാനും ചില കൊത്തുപണികളും ശൂലം, പെയിന്റിങ് തുടങ്ങിയ ജോലികളുമാണ് ബാക്കി. തിരുവിതാംകൂര്‍ ദേവസ്വം ബോര്‍ഡിന്റെ അധീനതയിലുള്ള തത്തമംഗലം ശ്രീമഹാദേവ ക്ഷേത്ര കവാടത്തിന് മുന്‍വശത്തായാണ് ഉടുക്കും ത്രിശൂലവുമേന്തി പത്മാസനത്തിനുളള ഭഗവാന്റെ ശില്‍പം കുടികൊള്ളുന്നത്.
ഏകദേശം അഞ്ച് ലക്ഷത്തോളം രൂപ ഇതിനോടകം ചെലവായതായി ശില്‍പി ഷൈന്‍ പറയുന്നു. പാവപ്പെട്ട കുടുംബത്തിലെ അംഗമായ ഷൈന്‍ ജോലി ചെയ്ത് കിട്ടിയ പണം സ്വരുക്കൂട്ടിയാണ് സ്വന്തം നാടിനായി മഹാദേവ ശില്‍പം ഒരുക്കിയത്. മെയ് പകുതിയോടെ നിര്‍മാണം പൂര്‍ത്തിയാകും.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: