പാലക്കാട് : സംസ്ഥാനത്ത് വീണ്ടും ആള്ക്കൂട്ടക്കൊലപാതകം. പാലക്കാട് ഒലവക്കോട് യുവാവിനെ ആള്ക്കൂട്ടം തല്ലിക്കൊന്നു. ബൈക്ക് മോഷ്ടിച്ചുവെന്നാരോപിച്ച് ആള്ക്കൂട്ടം മര്ദ്ദിച്ച് കൊല്ലുകയായിരുന്നു. മലമ്പുഴ കടുക്കാംകുന്നം സ്വദേശി റഫീഖാണ് ആണ് മരിച്ചത്.
പുലര്ച്ചെ ഒരു മണിയോടെയാണ് സംഭവം. മുണ്ടൂര് കുമ്മാട്ടിക്കെത്തിയ മൂന്നംഗ സംഘം അടുത്തുള്ള ബാറില് മദ്യപിക്കാന് കയറി. പുറത്തിറങ്ങിയപ്പോള് ഇവര് വന്ന ബൈക്ക് അവിടെയുണ്ടായിരുന്നില്ല. തുടര്ന്ന് സിസിടിവി ദൃശ്യങ്ങള് പരിശോധിച്ചപ്പോള് ഒരാള് ബൈക്ക് കൊണ്ടുപോകുന്നത് കണ്ടു. ബൈക്ക് മോഷ്ടാവിനായുള്ള തെരച്ചലിനിടെ റഫീഖ് ഇവരുടെ ശ്രദ്ധയില്പെടുകയും മര്ദ്ദിക്കുകയുമായിരുന്നു. ബൈക്ക് കൊണ്ടുപോയ ആള് ധരിച്ച അതേ വസ്ത്രങ്ങളായിരുന്നു റഫീഖും ധരിച്ചത്.
പതിനഞ്ചോളം പേര് ചേര്ന്നാണ് റഫീഖിനെ മര്ദ്ദിച്ചതെന്നാണ് ദൃക്സാക്ഷികള് നല്കുന്ന വിവരം. ഇവരാണ് പോലീസിനെ വിളിച്ചു വരുത്തിയത്. പോലീസ് എത്തിയ ശേഷമാണ് റഫീഖിനെ ആശുപത്രിയിലെത്തിച്ചത്. എന്നാല് അപ്പോഴേക്കും മരണം സംഭവിച്ചിരുന്നു. സംഭവത്തില് മൂന്ന് പേരെ പാലക്കാട് നോര്ത്ത് പോലീസ് കസ്റ്റഡിയില് എടുത്തു. ആലത്തൂര് സ്വദേശി മനീഷ്, കൊല്ലങ്കോട് സ്വദേശി ഗുരുവായൂരപ്പന്, പല്ലശന സ്വദേശി സൂര്യ എന്നിവരാണ് നിലവില് പോലീസ് കസ്റ്റഡിയിലുള്ളത്.
റഫീഖ് നേരത്തേയും മോഷണക്കേസുകളില് പ്രതിയായിട്ടുണ്ടെന്ന് പോലീസ് അറിയിച്ചു. ബൈക്ക് കൊണ്ടുപോയത് റഫീഖ് ആണോയെന്നതില് വ്യക്തതയില്ല. 2018ല് പാലക്കാട് നോര്ത്ത് സ്റ്റേഷനിലെ വാഹനമോഷണ കേസില് റഫീഖും പ്രതിയാണ്. ഇതേ വര്ഷം കഞ്ചാവു കടത്ത് കേസിലും ഇയാള് അറസ്റ്റിലായിട്ടുണ്ട്. പാലക്കാട് കസബ സ്റ്റേഷനിലും കേസ് രജിസ്റ്റര് ചെയ്തിട്ടുണ്ട്.
