കൊളംബോ: സാമ്പത്തിക, ഭരണ പ്രതിസന്ധിക്ക് ഉത്തരവാദിയായ പ്രസിഡന്റ് ഗോദാഭയ രജപക്ഷെയ്ക്കെതിരായ പ്രക്ഷോഭം ലങ്കന് തെരുവുകളെ പ്രകമ്പനം കൊള്ളിക്കുന്നു. എന്നാല്, രാജിവയ്ക്കില്ലെന്ന ഉറച്ച നിലപാടിലാണ് പ്രസിഡന്റ്. അതിനിടെ, സാമ്പത്തിക പ്രതിസന്ധി തരണം ചെയ്യാന് ഐഎംഎഫില് നിന്ന് വായ്പയെടുക്കാനുള്ള ശ്രമങ്ങളും പ്രസിഡന്റ് ഊര്ജ്ജിതമാക്കി. ഇതിന്റെ ഭാഗമായി ഐഎംഎഫുമായി ചര്ച്ച ചെയ്യാന് മൂന്നംഗ ഉപദേശക സമിതി രൂപീകരിച്ചു.
കടങ്ങള് പുനഃസംഘടിപ്പിക്കാനും ഗോദാഭയ ശ്രമം തുടങ്ങി. ഇതിനുംഒരു സമിതി രൂപീകരിച്ചു. ലങ്കന് സെന്ട്രല് ബാങ്ക് മുന് അധ്യക്ഷന് ഡോ. ഇന്ദ്രജിത്ത് കുമാരസ്വാമി, ലോകബാങ്ക് മുന് ചീഫ് എക്കണോമിസ്റ്റ് പ്രൊഫ. ശാന്താ ദേവരാജന്, ഐഎംഎഫ് മുന് ഡയറക്ടര് ഡോ. ശര്മ്മിണി കൂറെ എന്നിരാണ് സമിതിയില്.
ജൂലൈയില് കാലാവധി കഴിയുന്ന ഒരു ബില്ല്യണ് ഡോളറിന്റെ കട ബാധ്യതാ സെക്യൂരിറ്റി (സോവറിന് ബോണ്ട്) പുനഃസംഘടിപ്പിക്കണമെന്നും കടങ്ങള്ക്ക് മൊറട്ടോറിയം ഏര്പ്പെടുത്തണമെന്നും എങ്കിലേ പ്രതിസന്ധിയില് നിന്ന് ക്രമേണ പുറത്തുകടക്കാന് കഴിയൂയെന്നും ഒരു ദിവസം മാത്രം ധനമന്ത്രി പദത്തിലിരുന്ന് രാജിവയ്ക്കേണ്ടി വന്ന അലി സാബ്രി പറഞ്ഞു. അതിനിടെ, ഇന്ന് ലങ്കന് സെന്ട്രല് ബാങ്കിന്റെ അടിയന്തര യോഗം ചേര്ന്ന് വായ്പകളുടെ പലിശനിരക്ക് നിശ്ചയിക്കും. 18.7 ശതമാനമായ നാണയപ്പെരുപ്പം നിയന്ത്രിക്കാന് പലിശ 300 മുതല് 400 പോയന്റുകള് വരെ ഉയര്ത്തിയേക്കും. അലി സാബ്രിക്കു പകരം ധനമന്ത്രിയെ കണ്ടെത്താനുള്ള ശ്രമത്തിലാണ് ഗോദാഭയ.
പ്രമേഹം, ഹൃദ്രോഗം എന്നിവയ്ക്കടക്കമുള്ള മരുന്നുകള് ലങ്കയില് കിട്ടാനില്ലാതായി. മിക്ക അവശ്യമരുന്നുകളുടെയും അവസ്ഥയിതാണ്. മരുന്നു ക്ഷാമത്തില് പ്രതിഷേധിച്ച് ഡോക്ടമാരും മെഡിക്കല് വിദ്യാര്ഥികളും തെരുവില് പ്രകടനങ്ങളും സമരങ്ങളും തുടങ്ങി. പലയിടങ്ങളിലും ബാരിക്കേഡുകളും വേലിക്കെട്ടുകളും തകര്ത്താണ് പ്രതിഷേധങ്ങള് അരങ്ങേറുന്നത്. തങ്ങളുടെ പൗരന്മാര് ലങ്കയില് വിനോദസഞ്ചാരത്തിനോ മറ്റാവശ്യങ്ങള്ക്കോ പോകുന്നത് അമേരിക്ക വിലക്കി.
