പാരിസ്: ഫ്രാന്‍സില്‍ ഇപ്പോഴത്തെ പ്രസിഡന്റ് ഇമ്മാനുവല്‍ മാക്രോണിനെതിരെ പ്രസിഡന്റ് സ്ഥാനത്തേക്ക് മത്സരിക്കുന്ന പ്രധാന പ്രതിപക്ഷനേതാവ് മാരീന്‍ ലെപെന്‍ ഇസ്ലാമിക തീവ്രവാദത്തിനെതിരെ കടുത്ത നിലപാടുമായി രംഗത്ത്. സീറ്റ് ബെല്‍റ്റിടാതെ കാറോടിക്കുന്നവര്‍ക്ക് പൊലീസ് ശിക്ഷ നല്‍കുന്നതുപോലെ പൊതുവേദികളില്‍ ശിരോവസ്ത്രം ധരിച്ചാല്‍ പൊലീസ് പിഴ ചുമത്തുന്ന നിയമം കൊണ്ടുവരുമെന്നതാണ് ലേ പെന്‍ നല്‍കുന്ന പ്രധാന വാഗ്ദാനങ്ങളില്‍ ഒന്ന്.
ഇതുവഴി താന്‍ ഇസ്ലാമിക തീവ്രവാദത്തിനെതിരെ കടുത്ത നിലപാടെടുക്കുമെന്ന പ്രഖ്യാപനം നടത്തുകയായിരുന്നു ലേ പെന്‍. എന്നാല്‍ ഇസ്ലാമിക തീവ്രവാദത്തിനെതിരെ ശക്തമായ നിലപാടെടുക്കുന്ന ഇമ്മാനുവല്‍ മാക്രോണ്‍ തന്നെയാണ് പ്രചാരണത്തിന്റെ ആദ്യഘട്ടം താണ്ടുമ്പോള്‍ മുന്നില്‍. ഏപ്രില്‍ 24ന് അവസാനഘട്ടത്തില്‍ മുന്നേറാമെന്ന പ്രതീക്ഷയിലാണ് ലേ പെന്‍.
കഴിഞ്ഞ ദിവസം ആര്‍ടിഎല്‍ റേഡിയോയില്‍ നടന്ന ചര്‍ച്ചയിലാണ് ഹിജാബ് പൊതു സ്ഥലങ്ങളില്‍ നിരോധിക്കുമെന്ന കടുത്ത നിലപാട് ലേ പെന്‍ പ്രഖ്യാപിച്ചത്. ഇത് ഒരു നിയമം പോലെ പൊലീസ് നടപ്പാക്കും. കാറോടിക്കുന്നവര്‍ സീറ്റ് ബെല്‍റ്റ് ധരിച്ചില്ലെങ്കില്‍ പൊലീസ് ശിക്ഷ നല്‍കും. അതുപോലെ പൊതു സ്ഥലങ്ങളില്‍ ഹിജാബ് ധരിച്ചാല്‍ പൊലീസ് ശിക്ഷിക്കും. – ലേ പെന്‍ പറഞ്ഞു.
അതുപോലെ സ്‌കൂളുകളില്‍ മത ചിഹ്നങ്ങള്‍ ധരിക്കുന്നതും മുഖം മറയ്‌ക്കുന്ന ഇസ്ലാം വസ്ത്രങ്ങള്‍ ധരിയ്‌ക്കുന്നതും(ഹിജാബ്) നിരോധിച്ചുള്ള ഉത്തരവ് കര്‍ശനമായി നടപ്പാക്കുമെന്നും ലേ പെന്‍ പറഞ്ഞു. കടുത്ത ഇസ്ലാം വിരുദ്ധ നിലപാടുമായി പ്രചാരണത്തില്‍ മുന്നേറുന്ന ലേ പെന്‍ റേറ്റിംഗിന്റെ കാര്യത്തില്‍ ഇപ്പോള്‍ മാക്രോണിന് തൊട്ടടുത്ത് തന്നെയാണ്.
ഇസ്ലാമിക തീവ്രവാദം കൊണ്ട് പൊറുതിമുട്ടുന്ന ഒരു പ്രധാന യൂറോപ്യന്‍ രാഷ്‌ട്രമാണ് ഫ്രാന്‍സ്. 1979 മുതല്‍ 2021 വരെയുള്ള കാലഘട്ടത്തില്‍ 82 ഇസ്ലാമിക തീവ്രവാദ ആക്രമണങ്ങള്‍ നടന്നു. ഇതില്‍ 332 പേര്‍ കൊല്ലപ്പെട്ടു. കത്തിയാക്രമണത്തില്‍ പരിക്കേറ്റ് കഴിയുന്നവര്‍ 928 പേര്‍ വരും. ഇതാണ് ഇസ്ലാമിക തീവ്രവാദത്തിനെതിരെ കടുത്ത നിലപാടെടുക്കാന്‍ സ്ഥാനാര്‍ത്ഥികളെ പ്രേരിപ്പിക്കുന്നത്.
പ്രതികരിക്കാൻ ഇവിടെ എഴുതുക: