കൊല്ലം: നഗരസഭയിലെ നികുതി വെട്ടിപ്പുമായി ബന്ധപ്പെട്ട് സസ്‌പെന്‍ഷനിലായിരുന്ന ഉദ്യോഗസ്ഥയെ വീണ്ടും സാമ്പത്തിക കാര്യങ്ങള്‍ കൈകാര്യം ചെയ്യുന്ന സെക്ഷന്റെ മേധാവിയാക്കിയെന്ന് ആക്ഷേപം. തിരുവനന്തപുരം നഗരസഭയിലെ നികുതിവെട്ടിപ്പുമായി ബന്ധപ്പെട്ട് തിരുവനന്തപണ്ടുരത്ത് നിന്ന് ട്രാന്‍സ്ഫര്‍ ചെയ്ത് കൊല്ലം നഗരസഭയില്‍ എഒ തസ്തികയില്‍ നിയമിക്കുകയും പ്രാഥമികാന്വേഷണ റിപ്പോര്‍ട്ടിന്റെ അടിസ്ഥാനത്തില്‍ കുറ്റക്കാരിയാണെന്ന് കണ്ട് സസ്‌പെന്‍ഷനിലാകുകയും ചെയ്ത അക്കൗണ്ട് ഓഫീസര്‍ ലളിതാംബികയെയാണ് വീണ്ടും സാമ്പത്തിക കാര്യങ്ങള്‍ കൈകാര്യം ചെയ്യുന്ന അക്കൗണ്ട് സെക്ഷന്റെ മേധാവിയായി പുനര്‍നിയമനം നല്‍കിയത്.
മാര്‍ച്ച് 31ന് സസ്‌പെന്‍ഷന്‍ കാലാവധി തീര്‍ന്നതോടെയാണ് പുതിയ നിയമനം. അഴിമതി നടത്തിയതിന് സസ്‌പെന്‍ഷനിലായ ഉദ്യോഗസ്ഥയെ വീണ്ടും അതേ സെക്ഷനിലെ ഉയര്‍ന്ന പോസ്റ്റില്‍ നിയമിക്കുന്നത് തെറ്റായ കീഴ്‌വഴക്കം സൃഷ്ടിക്കുമെന്നാണ് ഒരുവിഭാഗം ഉദ്യോഗസ്ഥരുടെ പക്ഷം. ആരോപണ വിധേയയായ ഉദ്യോഗസ്ഥയെ വീണ്ടും സാമ്പത്തിക കാര്യങ്ങള്‍ കൈകാര്യം ചെയ്യുന്ന തസ്തികയിലേക്ക് നിയമിച്ചത് കോര്‍പ്പറേഷന്‍ ഭരണത്തിലെ പ്രതിപക്ഷകക്ഷികളിലും എതിര്‍പ്പ് ഉയര്‍ത്തിയിട്ടുണ്ട്.
സംസ്ഥാന ഓഡിറ്റ് വകുപ്പിന്റെ പരിശോധനയിലാണ് നികുതി തട്ടിപ്പ് കണ്ടെത്തിയത്. 2020 ജനുവരി 24 മുതല്‍ 2021 ജൂലൈ 11 വരെയുള്ള ഒന്നര വര്‍ഷത്തെ കണക്കുകളാണ് പരിശോധിച്ചത്. തിരുവനന്തപുരം നഗരസഭയിലെ മൂന്ന് സോണല്‍ ഓഫീസുകളില്‍ നിന്നായി ഏകദേശം 33,54,169 രൂപയാണ് ഉദ്യോഗസ്ഥര്‍ വെട്ടിച്ചത്. സോണല്‍ ഓഫീസുകളില്‍ ജനങ്ങളില്‍നിന്നു സ്വീകരിക്കുന്ന പണം അന്നോ, തൊട്ടടുത്ത പ്രവൃത്തി ദിവസം രാവിലെ 12ന് മുമ്പോ വികാസ് ഭവനിലെ എസ്ബി എസ്ബിഐ ബാങ്കിലെ സെക്രട്ടറിയുടെ അക്കൗണ്ടിലേക്ക് അടയ്‌ക്കണമെന്നാണു നിര്‍ദ്ദേശം. ഇതിനായി ചുമതലപ്പെടുത്തിയ ജീവനക്കാര്‍ പണം ബാങ്കില്‍ അടച്ചില്ലെന്നാണ് കണ്ടെത്തിയത്.
ശ്രീകാര്യം സോണില്‍ 500785 രൂപ ബാങ്കിലടയ്‌ക്കാത്ത കാഷ്യര്‍ അനില്‍കുമാര്‍, ഓഫീസ് അസിസ്റ്റന്റ് ബിജു, നേമം സോണില്‍ 26,74,333 രൂപ ബാങ്കില്‍ അടയ്‌ക്കാത്ത കാഷ്യര്‍ എസ്. സ്മിത, സുപ്രണ്ട് ശാന്തി, ആറ്റിപ്ര സോണില്‍ 1,09,836 രൂപ ബാങ്കിലിടാത്ത ജോര്‍ജ്കുട്ടി എന്നിവരെ ഇതിന്റെ പേരില്‍ നഗരസഭ സസ്‌പെന്‍ഡ് ചെയ്തിട്ടുണ്ട്. ശ്രീകാര്യം സോണിലെ അന്നത്തെ ചാര്‍ജ് ഓഫീസറും കൊല്ലം നഗരസഭയിലെ ജീവനക്കാരിയുമായ ലളിതാംബികയ്‌ക്കെതിരെയും നിയമനടപടി സ്വീകരിച്ചിരുന്നു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: