പൊയിനാച്ചി: പടിയിറങ്ങുന്നതിലും വ്യത്യസ്തത പുലര്ത്തി നാല് അധ്യാപകര്. മൂന്നു പതിറ്റാണ്ടുകാലം അക്ഷരവെളിച്ചമേകിയ ഈ അധ്യാപകര് പടിയിറങ്ങിയത് സ്കൂള് മുറ്റത്ത് മഹാത്മാഗാന്ധിയുടെ പൂര്ണകായ ശില്പം ഒരുക്കി. ചട്ടഞ്ചാല് ഹയര് സെക്കന്ററി സ്കൂളിലെ പ്രിന്സിപ്പല് പി.രതീഷ് കുമാര്, ഹൈസ്കൂള് വിഭാഗം സാമൂഹ്യശാസ്ത്ര അധ്യാപകന് ഇ.വേണുനാഥന് നായര്, ഉറുദു അധ്യാപിക പി.ഫാത്തിമ, ജീവശാസ്ത്ര അധ്യാപിക പി.വി.രാധിക എന്നിവരാണ് ഇന്നലെ വിരമിച്ചത്. ഇതിന് മുന്നോടിയായി എന്നെന്നും ഓര്മകളുണര്ത്താന് വിദ്യാലയ മുറ്റത്ത് ശില്പം സ്ഥാപിച്ചത്.
ഇന്ന് ചെയ്യുന്ന പ്രവൃത്തിയെ ആശ്രയിച്ചിരിക്കും നിങ്ങളുടെ ഭാവിയെന്ന് അതില് രേഖപ്പെടുത്തിയാണ് അധ്യാപകരുടെ പടിയിറക്കം. മഹാത്മഗാന്ധിയുടെ സന്ദേശങ്ങള് പുതിയ തലമുറക്ക് ആവശ്യമാണ് എന്ന ഉദ്ദേശം കണ്ടാണ് പ്രതിമ നിര്മിച്ചതെന്ന് വിരമിക്കുന്ന അധ്യാപകനായ രതീഷ് കുമാര് പറഞ്ഞു. മൂന്നടി ഉയരമുള്ള വെങ്കലനിറത്തോടുകൂടിയ ഫൈബര് ശില്പം അഞ്ചടി ഉയരമുള്ള പീഠത്തിന് മുകളിലാണ് സ്ഥാപിച്ചിരിക്കുന്നത്.
കാഞ്ഞങ്ങാട് ദുര്ഗാ ഹയര് സെക്കന്ഡറി സ്കൂളിലെ ചിത്രകലാ അധ്യാപകനായ ചിത്രന് കുഞ്ഞിമംഗലമാണ് ശില്പി. കളിമണ്ണില് ശില്പം നിര്മിച്ച് പ്ലാസ്റ്റര് ഓഫ് പാരീസില് മോള്ഡ് ചെയ്തതിനുശേഷമാണ് ഫൈബറില് ഗാന്ധിജിയുടെ രൂപത്തിന് പൂര്ണത വരുത്തിയത്. ദേശീയ അധ്യാപക അവാര്ഡ് ജേതാവ് കൂടിയായ പി.രതീഷ് കുമാര് 30 വര്ഷമായി ഹയര് സെക്കന്ററി അധ്യാപനരംഗത്തുണ്ട്.
78 തവണ രക്തദാനം നടത്തി ശ്രദ്ധേയനായ പയ്യന്നൂര് സ്വദേശിയായ ഇദ്ദേഹം ഒരുവര്ഷം പ്രിന്സിപ്പലായശേഷമാണ് വിരമിക്കുന്നത്. ഉദുമ പരിയാരം സ്വദേശിയായ ഇ.വേണുനാഥന് നായര് ഇപ്പോള് കരിവെള്ളൂര് വെള്ളച്ചാലിലാണ് താമസം. മലപ്പുറം സ്വദേശിനിയായ ഫാത്തിമ 28 വര്ഷമായി ഹൈസ്കൂള് ഉറുദു അധ്യാപികയാണ്. കാസര്കോട് കുഡ്ലു സ്വദേശിനിയായ പി.വി.രാധിക സ്വയം വിരമിക്കലിന് അപേക്ഷിക്കുകയായിരുന്നു. വിദ്യാലയമുറ്റത്ത് നടന്ന ചടങ്ങില് ഉദുമ എംഎല്എ സി.എച്ച്. കുഞ്ഞമ്പു ശില്പം അനാവരണം ചെയ്തു സ്കൂളിന് സമര്പ്പിച്ചു.
