കോട്ടയം: കേരളത്തെ രണ്ടാക്കി വെട്ടിമുറിക്കുന്ന കെ -റെയില് പദ്ധതിക്കെതിരെ ബിജെപി ജില്ലാ പ്രസിഡന്റ് ലിജിന് ലാലിന്റെ നേതൃത്വത്തില് നടത്തുന്ന പദയാത്രയ്ക്ക് വിവിധ കേന്ദ്രങ്ങളില് നല്കിയ സ്വീകരണത്തില് വന് ജനപങ്കാളിത്തം.
ഇന്നലെ രാവിലെ 10ന് മമ്മൂട് കവലയില് നിന്ന് ആരംഭിച്ച പദയാത്ര ബിജെപി സംസ്ഥാന അധ്യക്ഷന് കെ. സുരേന്ദ്രന് ഉദ്ഘാടനം ചെയ്തു. ആയിരങ്ങള് പദയാത്രയില് പങ്കെടുത്തു. പദയാത്ര കടന്നുപോയ പാതയുടെ ഇരുവശത്തും നിരവധി ആളുകളാണ് യാത്രയെ വരവേല്കുവാന് കാത്തു നിന്നത്. വീട്ടമ്മമാരും കുട്ടികളും പദയാത്രാ നായകന് ലിജിന് ലാലിനെ പൂച്ചെണ്ടും ഷാളും അണിയിച്ചാണ് വരവേറ്റത്. കെ റെയില് കടന്നു പോകുന്ന കുറുമ്പനാടം എഴുത്തുപടി, കണ്ണന്ചിറ എന്നിവിടങ്ങളില് കത്തുന്ന ചൂടിലും ന്യൂനപക്ഷ സമുദായങ്ങളില്പ്പെട്ട വനിതകള് ഉള്പ്പെടെ നിരവധിയാളുകള് ജാഥയെ സ്വീകരിക്കുവാന് എത്തിയിരുന്നു.
ജനങ്ങളുടെ നീറുന്ന പ്രശ്നമാണ് കെ റെയില് പദ്ധതിയെന്നും വീടും സ്ഥലവും നഷ്ടപ്പെടുന്നവര്ക്കേ അതിന്റെ വിഷമം മനസ്സിലാകൂവെന്നും അവരോടൊപ്പം അവരുടെ പ്രശ്നങ്ങള്ക്കു പരിഹാരം കാണുവാന് ബിജെപി എന്ന രാഷ്ട്രീയ പ്രസ്ഥാനം എന്നും കൂടെയുണ്ടാകുമെന്നും സ്വീകരണങ്ങള്ക്കു മറുപടിയായി ലിജിന് ലാല് പറഞ്ഞു.
