ലഖ്‌നൗ: ബിജെപിയുടെ വിജയം ആഘോഷിച്ചതിനും ബിജെപിയ്‌ക്ക് വോട്ട് ചെയ്തതിനും കുഷി നഗര്‍ ജില്ലയിലെ ഒരു മുസ്ലിം യുവാവിനെ അയല്‍ക്കാര്‍ അടിച്ചുകൊന്നതായി റിപ്പോര്‍ട്ട്. അവശനിലയില്‍ ലഖ്‌നോവിലെ ആശുപത്രിയില്‍ ചികിത്സയിലായ 25 കാരനായ ബാബര്‍ അലി ഞായറാഴ്ച മരിച്ചു. കുഷി നഗറിലെ രാംകോല പൊലീസ് സ്റ്റേഷന്‍ പരിധിയിലെ കാത്ഗറി ഗ്രാമത്തിലെ ആളാണ് ബാബര്‍ അലി.
ഇക്കാര്യത്തില്‍ വിശദമായ അന്വേഷണം നടത്താന്‍ മുഖ്യമന്ത്രി യോഗി ആദിത്യനാഥ് ഉത്തരവിട്ടു. ബാബറിന്റെ മരണത്തില്‍ മുഖ്യമന്ത്രി അനുശോചിക്കുകയും ചെയ്തു.
മാര്‍്ച്ച് 20നാണ് ബാബറിനെതിരെ ആക്രമണം നടന്നത്. കടയില്‍ നിന്നും വീട്ടിലേക്ക് മടങ്ങുകയായിരുന്ന ബാബറിനെ അയല്‍ക്കാര്‍ ആക്രമിക്കുകയായിരുന്നു. ബിജെപിയുടെ വിജയാഘോഷത്തില്‍ പങ്കെടുത്തതായിരുന്നു പ്രധാന ആക്രമണ കാരണം. ബിജെപിയെ അനുകൂലിച്ച് ബാബര്‍ ജയ് ശ്രീറാം വിളിച്ചതും കാരണമായി. പ്രാണരക്ഷാര്‍ത്ഥം വീടിന്റെ ടെറസില്‍ കയറാന്‍ ശ്രമിച്ച ബാബറിനെ അയല്‍ക്കാര്‍ പിന്തുടര്‍ന്ന് അടിച്ച് കെട്ടിടത്തില്‍ നിന്നും താഴേക്ക് വലിച്ചെറിയുകയായിരുന്നുവെന്ന് ബാബറിന്റെ ഭാര്യ ഫാത്തിമ പറഞ്ഞു.
ബാബറിന്റെ മരണത്തിന് ഉത്തരവാദികളായവരെ പിടികൂടാതെ അന്ത്യകര്‍മ്മങ്ങള്‍ നടത്തില്ലെന്ന് വീട്ടുകാര്‍ വാശിപിടിച്ചതോടെ സംഘര്‍ഷമായി. ‘നേരത്തെ ബിജെപിക്ക് വേണ്ടി പ്രവര്‍ത്തിച്ചതിന് ബാബറിനെ സമുദായത്തില്‍പ്പെട്ടവര്‍ താക്കീത് ചെയ്തിരുന്നു. തനിക്ക് സംരക്ഷണം വേണമെന്ന് ബാബര്‍ രാംകോല പൊലീസിനോട് ആവശ്യപ്പെട്ടിരുന്നു. പക്ഷെ ഈ അപേക്ഷ ആരും ചെവിക്കൊണ്ടില്ല’- ബാബറിന്റെ കുടുംബം പറയുന്നു.
ബാബറിന്റെ മരണത്തിന് ശേഷം ഭാര്യ ഫാത്തിമ പൊലീസില്‍ കേസ് രജിസ്റ്റര്‍ ചെയ്തിട്ടുണ്ട്. ഇതിന്റെ പേരില്‍ പൊലീസ് കേസെടുത്തു. കുറ്റം ചെയ്തവരെ ഉടന്‍ പിടികൂടുമെന്ന് സബ് ഡിവിഷണല്‍ മജിസ്‌ട്രേറ്റ് വരുണ്‍ കുമാര്‍ പാണ്ഡെ കുടുംബത്തെ സന്ദര്‍ശിച്ച് ഉറപ്പ് നല്‍കി. ഖുഷിനഗര്‍ എംഎല്‍എ പഞ്ചാനന്ദ് പതക്കും കുടുംബത്തെ സന്ദര്‍ശിച്ചു.
ഇക്കുറി മുസ്ലിങ്ങളുടെ പിന്തുണയും യോഗിക്ക് ലഭിച്ചിരുന്നു. ഇതിന് പ്രത്യുപകാരമായി മുസ്ലിം സമുദായത്തില്‍ നിന്നുള്ള ഡാനിഷ് ആസാദ് അന്‍സാരിയെ ന്യൂനപക്ഷക്ഷേമമന്ത്രിയാക്കിയിരുന്നു. പിന്നാക്ക മുസ്ലിം സമുദായത്തിന്റെ പ്രതിനിധിയാണ് അന്‍സാരി. എബിവിപിയിലൂടെ പ്രവര്‍ത്തിച്ച് നേതൃനിരയിലെത്തിയ യുവാവാണ് ഡാനിഷ് അന്‍സാരി.
പ്രതികരിക്കാൻ ഇവിടെ എഴുതുക: