ന്യൂദല്‍ഹി: പ്രധാനമന്ത്രി ഗരീബ് കല്യാണ്‍ അന്ന യോജന (പിഎം-ജികെഎവൈ) പദ്ധതി ആറ് മാസം കൂടി നീട്ടി. കേന്ദ്രമന്ത്രിസഭയുടേതാണ് തീരുമാനം. സപ്തംബര്‍ വരെയാണ് നീട്ടിയത്. പദ്ധതിയുടെ ആറാം ഘട്ടമാണിത്. അഞ്ചാം ഘട്ടം 2022 മാര്‍ച്ചില്‍ അവസാനിക്കാനിരിക്കെയാണ് തീരുമാനം.
ലോകത്തിലെ ഏറ്റവും വലിയ ഭക്ഷ്യസുരക്ഷാ പദ്ധതിയെന്ന നിലയില്‍ 2020 ഏപ്രില്‍ മുതലാണ് പദ്ധതി ആരംഭിച്ചത്. 80,000 കോടി രൂപ അടുത്ത ആറു മാസത്തിനുള്ളില്‍ ചെലവഴിക്കും. പിഎം-ജികെഎവൈക്ക് കീഴിലുള്ള മൊത്തം ചെലവ് ഏകദേശം 3.40 ലക്ഷം കോടി രൂപയാണ്. ഇന്ത്യയിലുടനീളമുള്ള ഏകദേശം 80 കോടി പേരാണ് പദ്ധതിയുടെ ഗുണഭോക്താക്കള്‍. കൊവിഡ് ഗണ്യമായി കുറയുകയും സാമ്പത്തിക പ്രവര്‍ത്തനങ്ങള്‍ക്ക് ആക്കം കൂട്ടുകയും ചെയ്യുന്നുണ്ടെങ്കിലും, ഈ വീണ്ടെടുപ്പിന്റെ സമയത്ത് ഒരു പാവപ്പെട്ട കുടുംബവും ഭക്ഷണമില്ലാതെ ഉറങ്ങില്ലെന്ന് ഈ വിപുലീകരണം ഉറപ്പാക്കും.
വിപുലീകൃത പിഎം-ജികെഎവൈ പ്രകാരം ഓരോ ഗുണഭോക്താവിനും എന്‍എഫ്എസ്എ പ്രകാരമുള്ള സാധാരണ ഭക്ഷ്യധാന്യ ക്വാട്ടയ്‌ക്ക് പുറമേ ഒരാള്‍ക്ക് പ്രതിമാസം അഞ്ചു കിലോ സൗജന്യ റേഷന്‍ ലഭിക്കും. പിഎം-ജികെഎവൈ പദ്ധതിക്ക് കീഴില്‍ അഞ്ചാം ഘട്ടം വരെ സര്‍ക്കാര്‍ ഏകദേശം 759 എല്‍എംടി സൗജന്യ ഭക്ഷ്യധാന്യങ്ങള്‍ അനുവദിച്ചിരുന്നു.
രാജ്യത്തുടനീളമുള്ള ഏകദേശം അഞ്ച് ലക്ഷം റേഷന്‍ കടകളില്‍ നിന്ന് വണ്‍ നേഷന്‍ വണ്‍ റേഷന്‍ കാര്‍ഡ് പദ്ധതിക്ക് കീഴിലുള്ള ഏതൊരു കുടിയേറ്റ തൊഴിലാളിക്കും, ഗുണഭോക്താവിനും പോര്‍ട്ടബിലിറ്റി വഴി സൗജന്യ റേഷന്റെ പ്രയോജനം ലഭിക്കും. നൂറ്റാണ്ടിലെ ഏറ്റവും മോശമായ പകര്‍ച്ചവ്യാധികള്‍ക്കിടയിലും ഇതുവരെയുള്ള ഏറ്റവും ഉയര്‍ന്ന സംഭരണം കാരണമാണ് പദ്ധതി സാധ്യമാക്കിയത്. സര്‍ക്കാര്‍ കര്‍ഷകര്‍ക്ക് എക്കാലത്തെയും ഉയര്‍ന്ന തുക നല്‍കി. കാര്‍ഷികമേഖലയിലെ ഈ റെക്കോര്‍ഡ് ഉത്പാദനത്തിന് ഇന്ത്യന്‍ കര്‍ഷകര്‍ അഭിനന്ദനം അര്‍ഹിക്കുന്നതായും മന്ത്രിസഭായോഗം അറിയിച്ചു.
