സിഡ്‌നി: ലോക ഒന്നാം നമ്പര്‍ വനിതാ ടെന്നീസ് താരം ആഷ്‌ലി ബാര്‍ട്ടി വിരമിച്ചു. ഇരുപത്തിയഞ്ചാം വയസിലാണ് ഓസ്‌ട്രേലിയന്‍ താരത്തിന്റെ ഞെട്ടിപ്പിക്കുന്ന തീരുമാനം. വിരമിക്കുകയാണെന്ന വിവരം ഇന്‍സ്റ്റഗ്രാം വീഡിയോയിലൂടെയാണ് ആഷ്‌ലി പുറത്തുവിട്ടത്.
‘ടെന്നീസില്‍ നിന്ന് വിരമിക്കല്‍ പ്രഖ്യാപിക്കല്‍ വളരെ ബുദ്ധിമുട്ടുള്ളതും വികാരം നിറഞ്ഞതുമാണ്. ടെന്നീസ് എനിക്ക് സമ്മാനിച്ച എല്ലാത്തിനും വളരെ നന്ദിയുണ്ട്, ഒപ്പം അഭിമാനവും സംതൃപ്തിയും തോന്നുന്നു. എന്നെ പിന്തുണച്ച എല്ലാവര്‍ക്കും നന്ദി.’ എന്നാണ് ഇന്‍സ്റ്റഗ്രാം പോസ്റ്റില്‍ പറയുന്നത്. കൂടുതല്‍ കാര്യങ്ങള്‍ നാളെ പത്ര സമ്മേളനത്തിലൂടെ വെളിപ്പെടുത്തുമെന്നും അവര്‍ വ്യക്തമാക്കി.
താന്‍ ക്ഷീണിതയാണെന്നും തനിക്ക് വേറെയും സ്വപ്നങ്ങളുണ്ടെന്നും അതിന് പിന്നാലെ പോകാന്‍ ഇതാണ് ശരിയായ സമയമെന്നും ആഷ്‌ലി ബാര്‍ട്ടി പറഞ്ഞു. 114 ആഴ്ചകളായി ലോക ഒന്നാം നമ്പര്‍ വനിതാ ടെന്നീസ് താരമാണ് ആഷ്‌ലി. ജനുവരിയില്‍ ഓസ്‌ട്രേലിയന്‍ ഓപ്പണ്‍ കിരീടം നേടിയിരുന്നു. 2019ല്‍ ഫ്രഞ്ച് ഓപ്പണ്‍, 2021ല്‍ വിംബിള്‍ഡണ്‍ കിരീടങ്ങള്‍ നേടി.
പ്രതികരിക്കാൻ ഇവിടെ എഴുതുക: