പോലീസ് ആളുമാറി കസ്റ്റഡിയിലെടുത്തു; തിരുവനന്തപുരത്ത് യുവാവിന് ഫോർട്ട് പോലീസിന്റെ ക്രൂരമർദ്ദനം, നട്ടെല്ലിന് പരിക്കേറ്റ യുവാവ് ചികിത്സയിൽ

തിരുവനന്തപുരം: മോഷണക്കേസിലെ പ്രതിയെന്ന് ആരോപിച്ച് ആളുമാറി ഓട്ടോറിക്ഷാ ഡ്രൈവറെ പോലീസ് തല്ലിച്ചതച്ചു. പോലീസ് മർദ്ദനത്തിൽ നട്ടെല്ലിന് പരിക്കേറ്റ ഓട്ടോഡ്രൈവർ പരാതിയുമായി രംഗത്ത് എത്തിയതോടെയാണ് സംഭവം വിവാദമായത്. മണക്കാട് സ്വദേശി കുമാറിനെയാണ് തിരുവനന്തപുരം ഫോർട്ട് പൊലീസ് കസ്റ്റഡിയിലെടുത്ത് മർദ്ദിച്ചത്.  

തിങ്കളാഴ്ച രാത്രിയായിന്നു സംഭവം. തിരുവനന്തപുരം മണക്കാട് സ്റ്റാന്‍ഡില്‍വെച്ചാണ് പോലീസ് തന്നെ പിടിച്ചതെന്ന് കുമാർ പറയുന്നു. പിടിച്ച ഉടനെ തന്നെ കസ്റ്റഡിയിലെടുത്തു ജീപ്പിൽ കേറ്റി. ജീപ്പിൽ വച്ചും പിന്നീട് പോലീസ് സ്റ്റേഷനിലും മര്‍ദനം തുടര്‍ന്നതായും കുമാര്‍ പറയുന്നു.  മർദ്ദനത്തിൽ സാരമായി പരിക്കേറ്റ കുമാർ ഇപ്പോൾ തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലാണ്.  

കുമാറിന്റെ ഓട്ടോയുടെ പേരും പ്രതിയെന്ന് സംശയിക്കുന്ന ആളുടെ ഓട്ടോയുടെ പേരും ഒന്നായതാണ് തെറ്റിദ്ധാരണയ്‌ക്ക് കാരണമായതെന്ന് ഫോർട്ട് പോലീസ് വിശദീകരിക്കുന്നു.  പിടിച്ചുപറി കേസിലെ പ്രതിയെ അന്വേഷിച്ച് പോയതാണെന്നും ആളുമാറി കസ്റ്റഡിയിലെടുത്ത കുമാറിനെ ചോദ്യം ചെയ്തു വിട്ടയക്കുകയായിരുന്നുവെന്നും മർദ്ദിച്ചതായി അറിയില്ലെന്നുമാണ് പോലീസിന്റെ വിശദീകരണം.