ശാസ്താംകോട്ട: പൊതുസമൂഹത്തിന്റെ സ്വത്ത് സംരക്ഷിക്കേണ്ട സര്‍ക്കാര്‍ തന്നെ അനധികൃത കയ്യേറ്റക്കാരായി തരം താണെന്ന് ഹിന്ദുഐക്യവേദി സംസ്ഥാന അധ്യക്ഷ കെ.പി. ശശികല ടീച്ചര്‍. ശൂരനാട് തെക്ക് കുമരം ചിറ ദേവീക്ഷേത്രഭൂമിയില്‍ റവന്യു അധികൃതര്‍ കയ്യേറിയ പ്രദേശം സന്ദര്‍ശിച്ച ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അവർ.
ക്ഷേത്രഭൂമിയാണന്ന് വ്യക്തമായ രേഖയുണ്ടായിട്ടും റവന്യു അധികൃതര്‍ ഇവിടം കയ്യേറി കല്ലിട്ടതിന് പിന്നില്‍ ദുരൂഹതയുണ്ട്. ദേവസ്വം ബോര്‍ഡ് കയ്യേറ്റത്തിനെതിരെ തുടക്കത്തില്‍തന്നെ രംഗത്ത് വന്നത് പ്രശംസനീയമാണ്. ഇക്കാര്യത്തില്‍ ഹിന്ദു ഐക്യവേദിയുടെ എല്ലാ പിന്തുണയും ദേവസ്വം ബോര്‍ഡിന് നല്‍കുമെന്നും ടീച്ചര്‍ അറിയിച്ചു. ഉന്നതരുടെ പിന്തുണ ഇല്ലാതെ ഇത് നടക്കില്ല. ശൂരനാട് തെക്ക് പഞ്ചായത്തില്‍ തന്നെ കണ്ണായ പല സ്ഥലങ്ങളിലും റവന്യു പുറം പോക്ക് പലരും കയ്യേറിയതായി മനസിലായിട്ടുണ്ടെന്നും ശശികല ടീച്ചര്‍ വ്യക്തമാക്കി.
ഹിന്ദു ഐക്യവേദി ദക്ഷിണമേഖല സംഘടനാ സെക്രട്ടറി പുത്തൂര്‍ തുളസി, ജില്ലാ സംഘടനാ സെക്രട്ടറി ഓച്ചിറ രവികുമാര്‍, താലൂക്ക് പ്രസിഡന്റ് രാജേന്ദ്രന്‍ തുടങ്ങിയവര്‍ അനുഗമിച്ചു.
അതേസമയം ദേവസ്വം ഭൂമി കയ്യേറിയ റവന്യു അധികൃതര്‍ക്ക് എതിരെ ദേവസ്വം ബോര്‍ഡ് ശാസ്താംകോട്ട കോടതിയില്‍ ഹര്‍ജി നല്‍കി. ഉപദേശക സമിതിയും പ്രക്ഷോഭ പരിപാടികള്‍ക്ക് രൂപം നല്‍കിയിട്ടുണ്ട്. പതാരം ടൗണില്‍ സ്വകാര്യ വ്യക്തികള്‍ കയ്യേറി വച്ചിരിക്കുന്ന 50 സെന്റോളം റവന്യു പുറം പോക്ക് ഭൂമിയുണ്ട്. നിലവില്‍ വില്ലേജ് ഓഫീസ് പ്രവര്‍ത്തിക്കുന്ന കെട്ടിടത്തിന് ചുറ്റുവട്ടത്താണ് ഈ പ്രദേശങ്ങള്‍ എല്ലാം. സിപിഎം അടക്കമുള്ള രാഷ്‌ട്രീയ പാര്‍ട്ടികളുടെ സംരക്ഷണയില്‍ കഴിയുന്ന ഈ കൈയേറ്റക്കാരെ ഒഴിപ്പിക്കാന്‍ തയ്യാറാകാതെ ക്ഷേത്രഭൂമി കയ്യേറി സ്മാര്‍ട്ട് വില്ലേജ് നിര്‍മ്മിക്കാനുള്ള നീക്കത്തിനെതിരെ പ്രതിഷേധം ശക്തമാക്കിയിട്ടുണ്ട്.
പ്രതികരിക്കാൻ ഇവിടെ എഴുതുക: