ചങ്ങനാശ്ശേരി: പ്രിയപ്പെട്ട കൂട്ടുകാരുടെ പിറന്നാള്‍ വരുന്നു.. അല്ലെങ്കില്‍ കല്യാണം വരുന്നു എന്ത് സമ്മാനം നല്കണമെന്നറിയാതെ കണ്‍ഫ്യൂഷനിലാണോ നിങ്ങള്‍, എന്നാല്‍ എല്ലാത്തിനും പരിഹാരമുണ്ട് ചങ്ങനാശ്ശേരി മോര്‍കുളങ്ങര സ്വദേശിനിയായ ദേവ്‌നയുടെ കൈയില്‍. നൂലുകള്‍ കൊണ്ട് ഇമോഷന്‍സിനെ തുന്നി ചേര്‍ക്കുകയാണ് ബിടെക് ബിരുദധാരിയായ ദേവ്‌ന. ലോക്ഡൗണ്‍ പലര്‍ക്കും പലരീതിയിലാണ് ഉപകാരപ്രദമായത്. എന്നാല്‍ ദേവ്‌നക്കിത് ഇത് സ്വന്തം കഴിവുകള്‍ കൂടി തിരിച്ചറിയാന്‍ കിട്ടിയ സമയമായിരുന്നു.
മുന്‍പ് ചിത്ര രചനയൊന്നും പഠിച്ചിട്ടില്ല. അതുകൊണ്ട് തന്നെ ആദ്യം ബന്ധുക്കള്‍ക്കായിരുന്നു ആര്‍ട്ട്‌വര്‍ക്ക് ചെയ്ത് കൊടുത്തിരുന്നത്. എന്നാല്‍ ഇപ്പോള്‍ ലോകത്തില്‍ എവിടെക്ക് വേണേലും തന്റെ ആര്‍ട്ട് വര്‍ക്കുകള്‍ നല്കാന്‍ തയാറാണ് ദേവ്‌ന.
കൂടുതലായും തന്റെ സോഷ്യല്‍ മീഡിയ പേജായ ഹൂപ്പി ഡെക്കോര്‍സ് വഴിയാണ് ഓര്‍ഡറുകള്‍ സ്വീകരിക്കുന്നത്. ഇന്‍സ്റ്റഗ്രാമില്‍ കണ്ട ഒരു റീല്‍സിലൂടെയാണ് സൂചിയുടെയും നൂലിന്റെയും വലിയ ലോകത്തിലേക്ക് ചേക്കേറിയത്. ഒരോരുത്തരുടെ ഇഷ്ടത്തിനും ആഗ്രഹത്തിനുമനുസരിച്ചുള്ള സമ്മാനങ്ങള്‍ നിര്‍മിച്ചു നല്കുമ്പോള്‍ കിട്ടുന്ന സന്തോഷം വളരെ വലുതാണെന്നും ദേവ്‌ന പറഞ്ഞു.
എഞ്ചിനീയറിങ് ബിരുദധാരിയാണെങ്കിലും കാന്‍വാസുകളുടെയും നിറങ്ങളുടെയും ലോകം തനിക്ക് നല്കുന്ന സന്തോഷവും സംതൃപ്തിയും വളരെ വലുതാണ്. അതുകൊണ്ട് തന്നെ ഇത് തന്നെ തുടരുമെന്നും അവര്‍ കൂട്ടിചേര്‍ത്തു. ഇപ്പോള്‍ ഓണ്‍ലൈനായി ഡിസൈനിങ്ങ് കൂടി പഠിക്കുന്നുണ്ട്.
ഭഗവാന്‍ ശിവന്റെ എംബ്രോയിഡറി ചെയ്തതാണ് തനിക്ക് ഏറ്റവും ഇഷ്ടപ്പെട്ട വര്‍ക്ക്. അതുകണ്ട് ഒരുപാട് പേര്‍ വിളിക്കുകയും അഭിനന്ദിക്കുകയും ചെയ്തിരുന്നു. ഒരിക്കലും കരുതിയിരുന്നില്ല ഈ മേഖലയിലേക്ക് എത്തുമെന്ന്. എന്നാല്‍ ഇപ്പോള്‍ ഇത് മനഃസുഖവും ആശ്വാസവും നല്കുന്നതായും ദേവ്‌ന പറയുന്നു. ഫെയ്‌സ് പോര്‍ട്ട്രെയിറ്റ്, ഹോം ഡെക്കോര്‍, എംബ്രോയ്ഡറി, കളര്‍ പെന്‍സില്‍ ഡ്രോയിങ്ങ് അങ്ങനെ എന്തു വേണമെങ്കിലും ദേവ്‌നയ്‌ക്ക് വഴങ്ങും.
പ്രതികരിക്കാൻ ഇവിടെ എഴുതുക: