പഴുവിൽ ( തൃശൂർ): തന്റെ ക്യാമറയിലൂടെ അനശ്വര നിമിഷങ്ങളെ ഓര്മചിത്രങ്ങളാക്കി പകര്ത്തി നല്കി ജീവിത ചിത്രത്തിന് ശോഭ പകരുകയാണ് ജിഷ എന്ന ഫോട്ടോഗ്രാഫര്. പഴുവില് സ്വദേശി ജിഷ രാജഷാണ് (35) പ്രൊഫഷണല് ഫോട്ടോഗ്രാഫര്മാര്ക്കിടയിലെ പെണ്തരികളില് ഒരാള്. വിവാഹം, നിശ്ചയം, മരണം, പിറന്നാള്, പൊതു ചടങ്ങുകള് എന്നുവേണ്ട ഏതിനും മറ്റു പുരുഷ ഫോട്ടോഗ്രാഫര്മാരുടെ ആധിപത്യം കൂടുതലുള്ള മേഖലയില് ആത്മവീര്യം കൊണ്ടും കലയോടുള്ള അഭിനിവേശം കൊണ്ടും തന്റേതായ ഇടം കണ്ടെത്താന് ജിഷക്ക് കഴിഞ്ഞു.
10 വര്ഷമായി ജിഷ ഫോട്ടോഗ്രാഫറുടെ മേലങ്കിയണിഞ്ഞിട്ട്. നിക്കോണ് ഡി-90 ക്യാമറയില് തുടങ്ങി ഇന്ന് കാനണ് മിറര്ലെസ് ഇ.ഒ.എസ്.ആര് ക്യാമറയിലാണ് ചിത്രങ്ങള് പകര്ത്തുന്നത്. വീഡിയോഗ്രഫറായ ഭര്ത്താവ് രാജേഷുമൊത്ത് കളര് ഡ്രീംസ് എന്ന പേരില് രണ്ട് സ്റ്റുഡിയോ ഇവര് നടത്തുന്നുണ്ട്. കല്യാണ ആല്ബങ്ങള് ഡിജിറ്റല് ഡിസൈനിങ്ങ് ചെയ്യുന്നതിലും ജിഷക്ക് തന്റേതായ ശൈലിയുണ്ട്. നൂറുകണക്കിന് വിഹാഹങ്ങള്ക്ക് ജിഷയുടെ ക്യാമറാക്കണ്ണുകള് തുറന്നടഞ്ഞിട്ടുണ്ട്. ആള് കേരള ഫോട്ടോഗ്രാഫേഴ്സ് അസോസിയേഷന് കാട്ടൂര് യൂണിറ്റ് പ്രസിഡന്റും ഇരിങ്ങാലക്കുട മേഖലയിലെ ആദ്യ വനിതാ മെമ്പറുമാണ് ജിഷ രാജേഷ്. മക്കള്: അമൃത ലക്ഷ്മി, അമല് ദേവ.
