തൃശ്ശൂര്‍: ഭാരത പര്യടനത്തിന്റെ ഊര്‍ജം പകര്‍ന്ന് ആറ് വര്‍ഷം നീളുന്ന ലോക സഞ്ചാരത്തിന് തുനിഞ്ഞിറങ്ങി തൃശ്ശൂര്‍ സ്വദേശി ജോസ്. തന്റെ കെടിഎം 390 സൂപ്പര്‍ ബൈക്കില്‍ ഒറ്റയ്‌ക്ക് ലോകത്തിലെ ആറ് ഭൂഖണ്ഡങ്ങളിലായി പരന്നുകിടക്കുന്ന 192 രാജ്യങ്ങളിലൂടെ, മൂന്ന് ലക്ഷത്തിലധികം കിലോ മീറ്റര്‍ ആറ് വര്‍ഷത്തിനിടെ യാത്രചെയ്ത് പൂര്‍ത്തീകരിക്കുവാന്‍ തയ്യാറെടുക്കുന്നത് ഇ.പി. ജോസ് എന്ന തൃശ്ശൂര്‍ സ്വദേശിയാണ്.
മാര്‍ച്ച് ഏഴിനാണ് കൊച്ചി തുറമുഖത്തു് നിന്നും ബൈക്ക് കയറ്റി അയക്കുക. തുടര്‍ന്ന് യൂറോപ്പില്‍ ലോകസഞ്ചാരം ആരംഭിയ്‌ക്കും. അമേരിക്കയില്‍ ഐടി വിദഗ്ധനായി പ്രവര്‍ത്തിച്ചിരുന്ന ജോസ് ഇപ്പോള്‍ ചെമ്പുക്കാവ് എടക്കളത്തൂര്‍ അഞ്ജനം എന്ന വീട്ടിലാണ് താമസം.
2017ല്‍ ഭാരതപര്യടനം പൂര്‍ത്തിയാക്കിയിട്ടുള്ള ജോസ് മോട്ടോര്‍ സൈക്കിളില്‍ ഇന്ത്യയിലെ വിവിധ പ്രദേശങ്ങളിലേയ്‌ക്ക് നിരവധി ദീര്‍ഘസഞ്ചാരങ്ങള്‍ നടത്തിയ അനുഭവസമ്പത്തുമായാണ് ഇപ്പോള്‍ ലോകയാത്രയ്‌ക്ക് തയാറെടുക്കുന്നത്. മോട്ടോര്‍ സൈക്കിള്‍ കപ്പല്‍ മാര്‍ഗ്ഗം യൂറോപ്പിലേയ്‌ക്ക് കയറ്റിയയയ്‌ക്കുവാന്‍ കൊച്ചിയിലേയ്‌ക്ക് പോകുന്ന തൃശ്ശൂര്‍ ഗവ. എഞ്ചിനിയറിങ് കോളജിലെ പൂര്‍വ്വ വിദ്യാര്‍ത്ഥിയായ ജോസിന് ഞായറാഴ്ച വൈകിട്ട് ആറിന് കോളജ് അങ്കണത്തില്‍ സ്വീകരണം നല്‍കും.
യാത്രയ്‌ക്കിടയില്‍ ലോകത്തിലെ വിവിധ നഗരങ്ങളില്‍ തൃശൂര്‍ എഞ്ചിനീയറിങ് കോളജ് പൂര്‍വ്വ വിദ്യാര്‍ത്ഥികള്‍ ജോസിന് വരവേല്‍പ്പ് നല്കാന്‍ തീരുമാനിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: