ന്യൂദൽഹി: ഉക്രൈനില്‍ ആകെയുള്ള 20,000 ഇന്ത്യക്കാരില്‍ നിന്നും 12,000 പേരെ ഇന്ത്യയിലേക്ക് കൊണ്ടുവന്നതായി ഇന്ത്യന്‍ വിദേശകാര്യ സെക്രട്ടറി ഹര്‍ഷവര്‍ധന്‍ ശ്രിംഗ്ല. ഇതുവരെ ഉക്രൈനിലെ ഇന്ത്യക്കാരിൽ 60 ശതമാനം പേരെയും ഇതോടെ ഒഴിപ്പിച്ചെന്ന് വിദേശകാര്യ സെക്രട്ടറി വ്യക്തമാക്കി.ഇനി ഉക്രൈന്‍ വിടാനുള്ള 40 ശതമാനമാളുകളിൽ പകുതിയും ഖാർകീവ്, സുമി മേഖലകളിലാണുള്ളതെന്നും അദ്ദേഹം പറഞ്ഞു.
ഖാർകീവ്, സുമി വമേഖലയിലെ ഇന്ത്യക്കാരെ ഒഴിപ്പിക്കുക എന്ന പ്രാഥമിക ഉദ്ദേശത്തോടെ മോസ്‌കോയിലെ ഇന്ത്യൻ എംബസി സംഘം ഉക്രൈന്‍ അതിർത്തിയിലെത്തി. ബുധനാഴ്ച മുതൽ വ്യോമസേന വിമാനങ്ങൾ രക്ഷാദൗത്യത്തിന്റെ ഭാഗമാകും. സി17 വിമാനം ബുധനാഴ്ച റുമാനിയയിലേക്ക് തിരിക്കുമെന്നും കേന്ദ്രസർക്കാർ അറിയിച്ചു.
ഇന്ത്യക്കാരെ തിരികെ എത്തിക്കാനായി അടുത്ത മൂന്ന് ദിവസം 26 വിമാനങ്ങള്‍ ബുഡാപെസ്റ്റ്, ബുക്കാറസ്റ്റ് എന്നിവിടങ്ങളിലേക്ക് അയയ്‌ക്കുമെന്നും അദ്ദേഹം അറിയിച്ചു..ഉക്രൈന്റെ പടിഞ്ഞാറൻ അതിർത്തികളിലേക്ക് വേറെയും ഇന്ത്യൻ ഉദ്യോഗസ്ഥരെ അയക്കുമെന്ന് വിദേശകാര്യ സെക്രട്ടറി ഹർഷവർധൻ ശ്രിംഗ്ല അറിയിച്ചു.
15 ഉദ്യോഗസ്ഥരെ കൂടി അയയ്‌ക്കാൻ പ്രധാനമന്ത്രി വിളിച്ച ഉന്നത തല യോഗത്തിലാണ് തീരുമാനമായത്. നേരത്തെ ഉക്രൈൻ-റഷ്യ അംബാസിഡറുമായി സംസാരിച്ചുവെന്നും ഇപ്പോഴും ഖാർകീവിലും മറ്റ് സംഘർഷ മേഖലകളിലുമുള്ള ഇന്ത്യക്കാർക്ക് പുറത്തുകടക്കാൻ സുരക്ഷിതമായ പാത ഒരുക്കണമെന്ന് ശക്തമായി ആവശ്യപ്പെട്ടതായും വിദേശകാര്യ സെക്രട്ടറി വ്യക്തമാക്കി.
കീവിൽ നിന്നും എല്ലാ ഇന്ത്യക്കാരും പുറത്ത് കടന്നതായാണ് വിവരം. ഇത് സ്ഥിരീകരിച്ചതിന് പിന്നാലെ ആരും തന്നെ കീവിൽ നിന്നും ഇന്ത്യൻ എംബസിയെ ബന്ധപ്പെട്ടിട്ടില്ല. അതുകൊണ്ട് ഒരു ഇന്ത്യക്കാരനും കീവിൽ ഇനി കുടുങ്ങിക്കിടക്കുന്നില്ലെന്നാണ് കേന്ദ്രത്തിന് ലഭിച്ച വിവരമെന്നും വിദേശകാര്യ സെക്രട്ടറി പറഞ്ഞു.
പ്രതികരിക്കാൻ ഇവിടെ എഴുതുക: