തൃശ്ശൂര്: കൊടുങ്ങല്ലൂരില് ഒരു കുടുംബത്തിലെ നാലുപേരെ മരിച്ചനിലയില് കണ്ടെത്തി. ആത്മഹത്യ ആണെന്നാണ് പ്രാഥമിക നിഗമനം. കൊടുങ്ങലൂര് ഉഴവത്തുകടവ് സ്വദേശിയായ ആഷിഫ്, ഭാര്യ അബീറ, മക്കളായ അസറ ഫാത്തിമ, അനോനീസ എന്നിവരെയാണ് മരിച്ച നിലയില് കണ്ടെത്തിയത്. ആഷിഫിന് 40 വയസ്സും, ഭാര്യക്ക് 34 വയസ്സുമായിരുന്നു.
വിഷവാതകം ശ്വസിച്ചതിനെ തുടര്ന്നാണ് മരണം സംഭവിച്ചതെന്ന് റിപ്പോര്ട്ട്. വീട്ടിനുള്ളില് വിഷവാതകം നിറച്ച് ആത്മഹത്യ ചെയ്തതാകാനാണ് സാധ്യതയെന്നാണ് റിപ്പോര്ട്ടുകള് സൂചിപ്പിക്കുന്നത്. വീടിന്റെ മുകളിലെ നിലയിലെ റൂമില് നിന്നാണ് നാല് പേരെയും കണ്ടെത്തിയത്. അഷ്റഫിന്റെ കുടുംബവും ഈ വീട്ടില് ഉണ്ടായിരുന്നു. റൂമില് നിന്ന് ആഷിഫിന്റെ ആത്മഹത്യ കുറിപ്പും കണ്ടെത്തിയിട്ടുണ്ട്. കടുത്ത സാമ്പത്തിക ബാധ്യതയെ തുടര്ന്നാണ് ജീവന് ഒടുക്കുന്നതെന്നാണ് ആത്മഹത്യ കുറിപ്പില് പറഞ്ഞിരിക്കുന്നത്. ആഷിഫിന് സാമ്പത്തിക ബാധ്യത ഉണ്ടായിരുന്നതായി നാട്ടുകാരും ബന്ധുക്കളും പറയുന്നുണ്ട്. കൊടുങ്ങലൂര് പൊലീസ് സംഭവ സ്ഥലത്തെത്തിയിട്ടുണ്ട്. പോസ്റ്റ് മോര്ട്ടത്തിന് ശേഷം മാത്രമേ കൂടുതല് വിവരങ്ങള് പുറത്ത്വിടു. കേസില് അന്വേഷണം പുരോഗമിച്ച് വരികയാണ്.
നാല് പേരും പുറത്ത് കാണാത്തത് മൂലം കുടുംബങ്ങളും നാട്ടുകാരും നടത്തിയ പരിശോധനയിലാണ് സംഭവം പുറത്ത് അറിഞ്ഞത്. വാതില് ചവിട്ടി തുറന്ന് അകത്ത് കയറി പരിശോധിച്ചപ്പോഴാണ് നാലു പേരെയും മരിച്ച നിലയില് കണ്ടെത്തിയത്. മുറിക്കുള്ളില് എന്തോ വാതകം പുകച്ചിരുന്നതായും ഇവരെ മരിച്ച നിലയില് കണ്ടെത്തിയ കുടുംബാംഗങ്ങള് പറയുന്നുണ്ട്. റൂമിന്റെ ജനലുകളും വാതിലിന്റെ വിടവുകളും, വെന്റിലേറ്ററുകളും ടേപ്പ് വെച്ച് അടച്ച നിലയിലായിരുന്നു. റൂമില് കാര്ബണ് മോണോക്സൈഡിന്റെ സാന്നിധ്യവും കണ്ടെത്തിയിട്ടുണ്ട്.
