ഗാന്ധിനഗര്: കളഞ്ഞുകിട്ടിയ പാദസരം ഉടമയെ കണ്ടെത്തി തിരികെ ഏല്പ്പിച്ച് മെഡിക്കല് കോളജിലെ സുരക്ഷാ ജീവനക്കാര് മാതൃകയായി. കാവാലം സ്വദേശി സജിമോനാണ് സ്വര്ണപാദസരം തിരികെ നല്കിയത്.
കാവാലം കുന്നുമ്മ കിഴക്ക് ഏഴരച്ചിറയില് റോബി ബെന്നിയുടെ സ്വര്ണ പാദസരമാണ് ഇന്നലെ ആശുപത്രി പരിസരത്ത് നഷ്ടപ്പെട്ടത്. അമ്മ ലീലാമ്മ (67) മെഡി. കോളജില് ചികിത്സയിലാണ്. ഇന്നലെ രാവിലെ 8 മണിയോടെ അമ്മയ്ക്ക് ചായ വാങ്ങാന് പുറത്തേക്ക് പോയപ്പോഴാണ് റോബിയുടെ ഇടതുകാലിലെ പാദസരം നഷ്ടപ്പെട്ടത്. ഒരു മണിക്കൂര് കഴിഞ്ഞാണ് പാദസരം നഷ്ടപ്പെട്ട വിവരം ഇവര് അറിഞ്ഞത്. തുടര്ന്ന് വിവരം പോലീസില് അറിയിച്ചു.
അതേസമയം നഷ്ടപ്പെട്ട പാദസരം മെഡിക്കല് കോളജിലെ രക്ത ബാങ്കിനു സമീപം ഡ്യൂട്ടിയിലുണ്ടായിരുന്ന സജിമോന് ലഭിച്ചു. സജിമോന് ഇത് സര്ജന്റിനെ ഏല്പ്പിക്കുകയും ചെയ്തു. പിന്നീട് ഉടമയായ റോബിയെ കണ്ടെത്തി സര്ജന്റ് ഓഫീസില് വച്ച് പാദസരം കൈമാറുകയായിരുന്നു.
