തൊടുപുഴ : സ്വര്‍ണ്ണക്കടത്ത് കേസിലെ പ്രതി സ്വപ്‌ന സുരേഷ് എന്‍ജിഒ സംഘടനയില്‍ പുതിയ ജോലിയില്‍ പ്രവേശിച്ചു. ദല്‍ഹി ആസ്ഥാനമായി പ്രവര്‍ത്തിക്കുന്ന ഹൈറേഞ്ച് റൂറല്‍ ഡവലപ്‌മെന്റ് സൊസൈറ്റി(എച്ച്ആര്‍ഡിഎസ്) എന്ന എന്‍ജിഒയിലാണ് സ്വപ്‌ന സുരേഷ് ജോലിയില്‍ പ്രവേശിച്ചത്. തൊടുപുഴയിലെ ഓഫീസിലെത്തി സ്വപ്‌ന ഇന്ന് രാവിലെ ജോലിയില്‍ പ്രവേശിക്കുകയായിരുന്നു.
എച്ച്ആര്‍ഡിഎസ് ഇന്ത്യയുടെ കോര്‍പ്പറേറ്റ് സോഷ്യല്‍ റെസ്‌പോണ്‍സിബിലിറ്റി ഡയറക്ടറായാണ് സ്വപ്‌നയ്‌ക്ക് നിയമനം ലഭിച്ചിരിക്കുന്നത്. കമ്പനിക്കായി വിദേശത്തു നിന്നും പണം എത്തിക്കുകയാണ് സ്വപ്‌നയ്‌ക്കുള്ള ചുമതല.
ഈ മാസം 12നാണ് സ്വപ്‌നയ്‌ക്ക് എച്ച്ആര്‍ഡിഎസ് ഇന്ത്യ നിയമനത്തിനായുള്ള ഓഫര്‍ ലെറ്റര്‍ നല്‍കിയത്. അജി കൃഷ്ണന്റേതാണ് എച്ച്ആര്‍ഡിഎസ് ഇന്ത്യ. കേരളം, തമിഴ്‌നാട്, കര്‍ണ്ണാടക, ഗുജറാത്ത്, ത്രിപുര, ഉത്തരാഖണ്ഡ്, അസം, ഝാര്‍ഖണ്ഡ് എന്നീ സംസ്ഥാനങ്ങളിലെ ആദിവാസി മേഖലയില്‍ പദ്ധതികള്‍ നടപ്പാക്കുകയാണെന്നാണ് കമ്പനി അവകാശപ്പെടുന്നത്.
ഇന്ത്യയില്‍ 10 ലക്ഷം ആദിവാസി കുടുംബങ്ങള്‍ക്കു വീടു നിര്‍മിച്ചു നല്‍കുന്ന ‘സദ്ഗൃഹ’ പദ്ധതിയാണു എച്ച്ആര്‍ഡിഎസ് നിലവില്‍ ഏറ്റെടുത്തിരിക്കുന്നത്. അട്ടപ്പാടിയില്‍ 300 വീടുകള്‍ പൂര്‍ത്തിയാക്കി. സേലം കേന്ദ്രമായി പ്രവര്‍ത്തിക്കുന്ന സ്വാമി ആത്മ നമ്പിയാണ് അധ്യക്ഷന്‍. മുന്‍ കേന്ദ്രമന്ത്രി എസ്.കൃഷ്ണകുമാര്‍ നേരത്തെ അധ്യക്ഷനായിരുന്നു.
കേസുകളും വിവാദങ്ങളും സ്വപ്നയുടെ വ്യക്തിപരമായ കാര്യങ്ങളാണ്. സാമൂഹികസേവന രംഗത്തെ താല്‍പര്യവും പ്രവര്‍ത്തനശേഷിയും ഉപകാരപ്പെടുത്തുക മാത്രമാണ് എച്ച്ആര്‍ഡിഎസിന്റെ ലക്ഷ്യമെന്നും സ്ഥാപക സെക്രട്ടറി അജി കൃഷ്ണന്‍ പറഞ്ഞു.
പ്രതികരിക്കാൻ ഇവിടെ എഴുതുക: