ലഖ്‌നൗ: ഉത്തര്‍പ്രദേശിലെ കുശിനഗറില്‍ വിവാഹ ആഘോഷത്തിനിടെ കിണറ്റില്‍ വീണ് 13 പേര്‍ക്ക് ദാരുണാന്ത്യം. ഇന്നലെ രാത്രിയായിരുന്നു സ്ത്രീകളും കുട്ടികളും ഉള്‍പ്പെട്ട അപകടം ഉണ്ടായത്. വിവാഹവുമായി ബന്ധപ്പെട്ട ഹല്‍ദി ആഘോഷത്തിനിടക്കാണ് അപകടം സംഭവിച്ചത്. കിണറിന് മുകളില്‍ ഇട്ടിരുന്ന സ്ലാബ് തകര്‍ന്നാണ് അപകടമുണ്ടായതെന്ന് ജില്ലാ മജിസ്‌ട്രേറ്റ് എസ്. രാജലിംഗം പറഞ്ഞു.
വീടിനു മുറ്റത്തെ കിണറിനു മുകളില്‍ സ്ലാബ് ഇട്ടാണ് വിവാഹ വേദി ഉണ്ടാക്കിയിരുന്നത്. 20ലധികം ആളുകള്‍ മുകളിലേക്ക് കയറിയതോടെ സ്ലാബ് പൊട്ടുകയായിരുന്നു. മരിച്ച എല്ലാവരെയും തിരിച്ചറിഞ്ഞതായി ജില്ലാ ഭരണകൂടം അറിയിച്ചു. സ്ത്രീകളും കുട്ടികളും ഉള്‍പ്പെടെ 22 പേരാണ് കിണറിനുള്ളിലേക്ക് വീണത്. ഗ്രാമവാസികളും പൊലീസും ചേര്‍ന്ന് ഒമ്പതു പേരെ രക്ഷപ്പെടുത്തി.
സംഭവത്തില്‍ മുഖ്യമന്ത്രി യോഗി ആദിത്യനാഥ് അനുശോചനം രേഖപ്പെടുത്തി. മരണമടഞ്ഞവരുടെ കുടുംബങ്ങള്‍ക്ക് നാല് ലക്ഷം രൂപ വീതം സര്‍ക്കാര്‍ ധനസഹായമായി നല്‍കുമെന്ന് കളക്ടര്‍ അറിയിച്ചു. വിഷയത്തില്‍ കൂടുതല്‍ അന്വേഷണം നടത്തുമെന്ന് പൊലീസ് അറിയിച്ചു.
പ്രതികരിക്കാൻ ഇവിടെ എഴുതുക: