തിരുവനന്തപുരം: മുഖ്യമന്ത്രി വിദേശത്ത് പോയി നിക്ഷേപകരെ ക്ഷണിക്കുമ്പോള്‍ സിപിഎം കേരളത്തിലുള്ള സംരഭകരെ അടിച്ചോടിക്കുകയാണെന്ന് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍. വേലി തന്നെ വിളവ് തിന്നുന്ന അവസ്ഥയാണ് സംസ്ഥാനത്തുള്ളതെന്നും അദ്ദേഹം പ്രസ്താവനയില്‍ പറഞ്ഞു.
കണ്ണൂര്‍ മാതമംഗലത്ത് സിഐടിയു ഊരുവിലക്കിനെ തുടര്‍ന്ന് സംരഭകന് വ്യാപാരസ്ഥാപനം അടച്ചുപൂട്ടേണ്ടി വന്നത് കേരളത്തിലെ കമ്മ്യൂണിസ്റ്റ് ഭരണത്തിന്റെ ഭീകരത തെളിയിക്കുന്ന സംഭവമാണ്. തങ്ങള്‍ വിലക്കിയ കടയില്‍ നിന്ന് സാധനം വാങ്ങിയ ഉപഭോക്താവിനെ അടിച്ചോടിച്ച സിഐടിയുക്കാര്‍ ഭരണത്തിന്റെ തണത്തില്‍ നിയമം കൈയ്യിലെടുക്കുകയാണ്. വ്യവസായമോ കച്ചവടമോ തുടങ്ങാന്‍ സാധ്യമാകാത്ത തരത്തില്‍ കേരളത്തെ മാറ്റിയവരാണ് യുപിയേയും മറ്റ് സംസ്ഥാനങ്ങളെയും അപമാനിക്കുന്നത്. കേരളത്തില്‍ എന്തുകൊണ്ട് നിക്ഷേപകര്‍ വരുന്നില്ലെന്നതിന് പാഴൂര്‍ പടിപ്പുര വരെ പോവേണ്ടതില്ല. നിലവില്‍ സംസ്ഥാനത്തുള്ള നിക്ഷേപകര്‍ക്ക് സ്വന്തം പാര്‍ട്ടിക്കാരില്‍ നിന്നും സംരക്ഷണം കൊടുക്കുകയാണ് പിണറായി വിജയന്‍ ആദ്യം ചെയ്യേണ്ടതെന്ന് സുരേന്ദ്രന്‍ ചൂണ്ടിക്കാണിച്ചു.
സിഐടിയു ഗുണ്ടകള്‍ ഉപഭോക്താവിനെ മര്‍ദ്ധിച്ചിട്ടും പൊലീസ് കാഴ്ചക്കാരായി ഇരിക്കുകയാണ്. ജനങ്ങളുടെ സൈ്വര്യ ജീവിതത്തിന് ഭീഷണിയായി മാറിയിരിക്കുകയാണ് സിഐടിയു. തുടര്‍ ഭരണം എന്തും ചെയ്യാനുള്ള ലൈസന്‍സായാണ് സര്‍ക്കാര്‍ കണക്കാക്കുന്നത്. നോക്കുകൂലിക്കെതിരെ ഒരു നടപടിയുമെടുക്കാത്ത ഇടത് സര്‍ക്കാര്‍ കേരളത്തിലെ വ്യാവസായിക സ്ഥാപനങ്ങള്‍ അടച്ചുപൂട്ടിക്കുന്നതില്‍ ആനന്ദം കാണുകയാണ്. നിക്ഷേപകരെ പരിഗണിക്കുന്ന കാര്യത്തില്‍ പിണറായി വിജയന്‍ യോഗി ആദിത്യനാഥിനെ മാതൃകയാക്കണമെന്നും സുരേന്ദ്രന്‍ പറഞ്ഞു.
പ്രതികരിക്കാൻ ഇവിടെ എഴുതുക: