ബസ്താര് : ഛത്തീസ്ഗഡില് മാവോയിസ്റ്റ് ഭീകരരുമായുണ്ടായ ഏറ്റുമുട്ടലില് ഒരി സിആര്പിഎഫ് ജവാന് വീരമൃത്യു. സിആര്പിഎഫ് 168 ബറ്റാലിയന് അസിസ്റ്റന്റ് കമാന്റന്ഡ് എസ്ബി ടിര്ക്കിയാണ് വീരമൃത്യുവരിച്ചത്. ഏറ്റുമുട്ടലില് ഒരു ജവാന് പരിക്കേറ്റു. ബിജാപൂര് ജില്ലയില് രാവിലെയോടെയാണ് ഏറ്റുമുട്ടലുണ്ടായത്.
ബസഗുഡ പോലീസ് സ്റ്റേഷന് പരിധിയിലെ തിമ്മപ്പൂര്- പട്ടുക്കെല് മേഖലയില് സിആര്പിഎഫ് പെട്രോളിങ് നടത്തുന്നതിനിടെ ഭീകരര് ആക്രമണം നടത്തുകയായിരുന്നു. അപ്രതീക്ഷിത ആക്രമണത്തില് ടിര്ക്കിക്ക് ഗുരുതരമായി പരിക്കേറ്റ് ഉടനെ ആശുപത്രിയില് എത്തിച്ചെങ്കിലും മരിക്കുകയായിരുന്നു. പരിക്കേറ്റ ജവാന് ആശുപത്രിയില് ചികിത്സയിലാണ്.
മാവോയിസ്റ്റ് സാന്നിധ്യം രൂക്ഷമായ ഛത്തീസ്ഗഡിലെ ജില്ലകളില് ഒന്നാണ് ബിജാപുര്. സംഭവത്തിന്റെ പശ്ചാത്തലത്തില് പ്രദേശത്ത് അതീവ ജാഗ്രതാ നിര്ദ്ദേശം പുറപ്പെടുവിച്ചു. ഭീകരര്ക്കായി പ്രദേശത്ത് സിആര്പിഎഫ് സംഘം തെരച്ചില് നടത്തുകയാണ്.
