ചാലക്കുടി: അതിരപ്പിളളി പുളിയിലപ്പാറയില് വീണ്ടും പട്ടാപ്പകല് കാട്ടാന ആക്രമണം. അഞ്ച് വയസുളള കുട്ടിയുമായി സഞ്ചരിച്ച സംഘം രക്ഷപ്പെട്ടത് തലനാരിഴയ്ക്ക്. വ്യാഴാഴ്ച രാവിലെ ഏഴരയോടെ പെരിങ്ങല്ക്കുത്ത് വാല്വ് ഹൗസിന് സമീപത്ത് വെച്ചാണ് സംഭവം.
പുളിയില പാറ പട്ടത്ത് രമേശും ഭാര്യ ഷൈനിയും അഞ്ച് വയസ്സുകാരന് മൃദുഷും സ്കൂട്ടറില് ചാലക്കുടിയിലേക്ക് സഞ്ചരിക്കവെയാണ് കാട്ടാന പാഞ്ഞടുത്തത്. ആനയെ കണ്ട് ഭയന്ന് സ്കൂട്ടര് ഉപേക്ഷിച്ച് കുഞ്ഞിനെയുമെടുത്ത് ഇരുവരും ഓടി അടുത്ത വീട്ടില് കയറി രക്ഷപ്പെട്ടുകയായിരുന്നു. കാട്ടാന ശല്യത്തിനെതിരെ അടിയന്തര നടപടി സ്വീകരിക്കണമെന്നും കഴിഞ്ഞ ദിവസം കണ്ണംകുഴിയില് സംഭവിച്ചത് ആവര്ത്തിക്കാന് ഇടനല്കരുതെന്നും നാട്ടുകാര് ആവശ്യപ്പെട്ടു.
വനം വകുപ്പിന്റെ നേതൃത്വത്തില് രാത്രികാല പട്രോളിങ്ങ് ശക്തമാക്കിയിരിക്കുന്നതിനിടയിലാണ് പകല് സമയത്ത് ആനയുടെ ആക്രമണം. കഴിഞ്ഞ ദിവസം എംഎല്എ സനീഷ് കുമാര് ജോസഫും രാത്രിയില് നടക്കുന്ന പട്രോളിങ്ങ് പരിശോധിക്കുകയും ഉദ്യോഗസ്ഥര്ക്ക് മാര്ഗനിര്ദ്ദേശങ്ങള് നല്കുകയും ചെയ്തു.
