കോഴിക്കോട് : കഴിഞ്ഞ ദിവസം അന്തരിച്ച കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്റ് ടി. നസിറുദ്ദീനോടുള്ള ആദരസൂചകമായി ഇന്ന് സംസ്ഥാനവ്യാപകമായി വ്യാപാര സ്ഥാപനങ്ങള് അടച്ചിടും.
വ്യാപാരശാലകള്ക്ക് അവധി നല്കുമെന്ന തീരുമാനം കേരള വ്യാപാരി വ്യവസായി ഏകോപന സമിതിയാണ് അറിയിച്ചിട്ടുള്ളത്. മൂന്നു പതിറ്റാണ്ടിലേറെയായി സംഘടനയെ നയിച്ചുവന്ന നേതാവായിരുന്നു നസിറുദ്ദീന്. ഇന്നലെ രാത്രി ദേഹാസ്വാസ്ഥ്യം അനുഭവപ്പെട്ടതോടെ നഗരത്തിലെ സ്വകാര്യ ആശുപത്രിയില് പ്രവേശിപ്പിച്ചെങ്കിലും പത്തരയോടെ മരണം സംഭവിക്കുകയായിരുന്നു.
1991ലാണ് നസിറുദ്ദീന് സംഘടനയുടെ സംസ്ഥാന പ്രസിഡന്റായത് . ഭാരത് വ്യാപാരസമിതി അംഗം, വാറ്റ് ഇംപ്ലിമെന്റേഷന് കമ്മിറ്റി മെമ്ബര്, വ്യാപാരി ക്ഷേമനിധി വൈസ് ചെയര്മാന്, കേരള മര്ക്കന്റയില് ബാങ്ക് ചെയര്മാന്, ഷോപ്സ് ആന്ഡ് കൊമേഴ്സ്യല് എസ്റ്റാബ്ലിഷ്മെന്റ്സ് ക്ഷേമനിധി ബോര്ഡ് മെമ്ബര് എന്നീ നിലകളില് പ്രവര്ത്തിച്ചിട്ടുണ്ട്. വ്യാപാരികളുടെ അവകാശങ്ങള് നേടിയെടുക്കാന് വിട്ടുവീഴ്ചയില്ലാതെ പൊരുതുകയായിരുന്നു അദ്ദേഹം.
