കറുകച്ചാല്: പ്രതിയെ പിടിക്കാനെത്തിയ പോലീസ് സംഘത്തെ പ്രതിയും ഭാര്യയും ചേര്ന്ന് ആക്രമിച്ചു. കഴിഞ്ഞദിവസം കങ്ങഴയില് വെച്ച് ഓട്ടോ ഡ്രൈവറെ തടഞ്ഞുനിര്ത്തി പണം തട്ടിയെടുക്കാന് ശ്രമിച്ച കേസിലെ പ്രതി ചാരുപറമ്പില് ബിജു, ഇയാളുടെ ഭാര്യ മഞ്ജു എന്നിവരെ പോലീസ് അറസ്റ്റ് ചെയ്തു.
പണം തട്ടിയെടുത്ത കേസിന്റെ അന്വേഷണവുമായി എത്തിയ പോലീസുകാരെയാണ് പ്രതി ആക്രമിച്ചത്. മുണ്ടത്താനം പൂതകുഴിയില് ഓട്ടോ ഡ്രൈവറായ പ്രസാദ് കഴിഞ്ഞ ദിവസം രാത്രിയില് ഓട്ടം കഴിഞ്ഞ് മടങ്ങി വരുമ്പോള് മറ്റോരോട്ടോയില് എത്തിയ ബിജു തടഞ്ഞുനിര്ത്തി 5000ത്തോളം രൂപ തട്ടിയെടുത്തു. ഇത് പ്രസാദ് പോലീസില് പരാതി നല്കി.
ബിജുവിന്റെ ആക്രമണത്തില് പരിക്ക് പറ്റിയ പ്രസാദ് പാമ്പാടി ആശുപത്രിയിൽ ചികിത്സ തേടി. പരാതി അന്വേഷിക്കുന്നതിനായി ബിജുവിന്റെ വീട്ടിലെത്തിയ പോലീസിനെ കണ്ട് ബിജു ഓടി രക്ഷപെടാന് ശ്രമിച്ചു.തടയാന്ശ്രമിച്ച സിപിഓ വിനീത് ആര് നായരെ ബിജു കടിച്ചു. മറ്റ് പേലീസുകാര് ചേര്ന്ന് ബിജുവിനെ ഇതിനകം കീഴടക്കി. എന്നാല് പെട്ടെന്ന് ബിജുവിന്റെ ഭാര്യ മഞ്ചു പട്ടിക കൊണ്ട് പോലീസുകാരെ ആക്രമിച്ചു.
സിപിഒ മാരായ പി.ടി ബിജുലാല്, ബിബിന് ബാലചന്ദ്രന് എന്നിവര്ക്ക് പരിക്കേറ്റു. ആക്രമണത്തില് മഞ്ചുവിനെതിരെ മണിമല പോലീസും, പണം തട്ടിയ കേസില് ബിജുവിനെതിരെ കറുകച്ചാല് പോലീസും കേസ് രജിസ്റ്റര് ചെയ്തു.കോടതിയില് ഹാജരാക്കിയ ഇവരെ റിമാന്ഡ് ചെയ്തു.
