ഫേസ്ബുക്കിന്റെ പ്രതിദിന ഉപഭോക്താക്കളുടെ എണ്ണത്തില് ആദ്യമായി വന് ഇടിവ്. റിപ്പോര്ട്ടുകള് പുറത്തു വന്നതോടെ കമ്പനിയുടെ ഓഹരിയിലും വന് ഇടിവ് രേഖപ്പെടുത്തി.
ഉപഭോക്താക്കളുടെ എണ്ണത്തില് പ്രതീക്ഷിച്ച നേട്ടമുണ്ടാക്കാനായില്ലെന്ന കമ്പനിയുടെ പോസ്റ്റ് പുറത്തുവന്നതിന് പിന്നാലെ ഫെബ്രുവരി രണ്ടിന് മെറ്റാ പ്ലാറ്റ്ഫോംസിന്റെ ഓഹരിയില് 20 ശതമാനത്തിലേറെ ഇടിവുണ്ടായത്. ഇതുവഴി 20,000 കോടി ഡോളറിന്റെ നഷ്ടം കമ്പനിയ്ക്കുണ്ടായെന്നാണ് കണക്കുകള്. ആപ്പിളിന്റെ പുതിയ സ്വകാര്യതാ നയങ്ങളും നിയന്ത്രണങ്ങളും ടിക് ടോക്ക് പോലുള്ള എതിരാളികള് ഉപഭോക്താക്കളെ ആകര്ഷിച്ചതും തിരിച്ചടിയായെന്നാണ് കമ്പനിയുടെ വിലയിരുത്തല്.
18 വര്ഷക്കാലത്തെ ചരിത്രത്തിനിടയ്ക്ക് ഇതാദ്യമായാണ് ഫേസ്ബുക്കിന്റെ പ്രതിദിന സജീവ ഉപഭോക്താക്കളുടെ എണ്ണത്തില് ഇടിവുണ്ടായത്. ഇക്കഴിഞ്ഞ ഒക്ടോബര് മുതല് ഡിസംബര് വരെയുള്ള മാസങ്ങളില് ഫേസ്ബുക്കിന്റെ പ്രതിദിന ഉപഭോക്താക്കളുടെ എണ്ണം 1,93,000 കോടി ആയിരുന്നു. ഇപ്പോള് 1,92,900 കോടിയിലേക്ക് ഇടിഞ്ഞു.
ആപ്പിളിന്റെ ഓപ്പറേറ്റിങ് സിസ്റ്റത്തില് സ്വകാര്യതാ നയത്തിലുണ്ടായ മാറ്റങ്ങള് കമ്പനിയെ സാമ്പത്തികമായി ബാധിച്ചിട്ടുണ്ട്. ആപ്പിളിന്റെ ഓപ്പറേറ്റിങ് സിസ്റ്റങ്ങള് പരസ്യ വിതരണ സംവിധാനങ്ങളുടെ പ്രവര്ത്തനങ്ങള്ക്ക് കടുത്ത നിയന്ത്രണങ്ങള് ഏര്പ്പെടുത്തിയത് ഫേസ്ബുക്കിന്റെ പരസ്യ വിതരണത്തെ ബാധിച്ചു. ഇത് കൂടാതെ ആഗോള തലത്തിലുള്ള വിതരണ ശൃംഖലയില് പകര്ച്ചാ വ്യാധിയുടെ സമയത്തുണ്ടായ പ്രതിസന്ധികളും കമ്പനിയ്ക്ക് പൊതുവില് തിരിച്ചടിയായി.
ടിക്ടോക്ക്- യൂട്യൂബ് പോലുള്ള പ്ലാറ്റ് ഫോമുകള് വ്യാപകമായി ഉപഭോക്താക്കളെ ആകര്ഷിക്കാന് തുടങ്ങിയതും ഫേസ്ബുക്കിന് കനത്ത തിരിച്ചടിയായി. ട്വിറ്റര്, സ്നാപ്ചാറ്റ്, പിന്ററസ്റ്റ് എന്നീ സോഷ്യല് മീഡിയ പ്ലാറ്റ്ഫോമുകളിലെ ഓഹരിയും ഇടിഞ്ഞിട്ടുണ്ട്. അതേസമയം, ഫെബ്രുവരി ഒന്നിന് റെക്കോര്ഡ് ത്രൈമാസ വില്പ്പന രേഖപ്പെടുത്തിയ ആല്ഫബെറ്റിന്റെ ഓഹരികള് കഴിഞ്ഞ ദിവസം ഏകദേശം 2 ശതമാനം ഇടിഞ്ഞതായാണ് കണക്കുകള്.
