മുംബൈ : മഹാരാഷ്‌ട്ര നന്ദുര്‍ബാര്‍ സ്റ്റേഷന്റെ സമീപത്തായി ട്രെയിനിന് തീപിടിച്ചു. ഗാന്ധിധാം- പുരി എക്സ്പ്രസ്സിന്റെ പാന്‍ട്രി കാറിലാണ് തീപിടിത്തമുണ്ടായത്. ആളപായമില്ല. യാത്രക്കാര്‍ സുരക്ഷിതരാണെന്ന് അധികൃതര്‍ അറിയിച്ചു.
രാവിലെ പത്തരയോടെയാണ് തീപിടിത്തം ശ്രദ്ധയില്‍ പെടുന്നത്. ഇതോടെ ട്രെയിനിലും സ്റ്റേഷനിലും ഉണ്ടായിരുന്ന സുരക്ഷാ പ്രവര്‍ത്തകരെത്തി പാന്‍ട്രി കാര്‍ വേര്‍പ്പെടുത്തി. ഒരു മണിക്കൂറോളം നീണ്ട പരിശ്രമത്തിനൊടുവിലാണ് തീ അണച്ചത്.
22 കോച്ചുകളുളള ട്രെയിനിന്റെ 13ാമത്തെ കോച്ചാണ് പാന്‍ട്രി കാര്‍. മെഡിക്കല്‍ ടീമും പാരാമെഡിക്കല്‍ ടീമും സംഭവ സ്ഥലത്തെത്തിയിട്ടുണ്ട്. തീപിടുത്തത്തിന്റെ കാരണം വ്യക്തമല്ല. അന്വേഷണം പ്രഖ്യാപിച്ചതായി വെസ്റ്റേണ്‍ റെയില്‍വേ അറിയിച്ചു.
പ്രതികരിക്കാൻ ഇവിടെ എഴുതുക: