കൊല്ലം: സോഷ്യല് മീഡിയ തുണയായതോടെ സത്യനെ തേടി ബന്ധുക്കള് എത്തി. ആലപ്പുഴ കുടശ്ശനാട് മളവിളയില് വീട്ടില് സത്യനെ(28)യാണ് ബന്ധുക്കള് എത്തി വീട്ടിലേക്ക് കൊണ്ടുപോയത്. കഴിഞ്ഞ 15നാണ് ശക്തികുളങ്ങര പോലീസ് സ്റ്റേഷന് പരിസരത്ത് അവശനായ യുവാവിനെ കാണുന്നത്.
സംസാരിക്കാന് സാധിക്കാത്ത, നടക്കാന് ബുദ്ധിമുട്ട് അനുഭവിക്കുന്ന യുവാവിന് സ്വന്തം വീടോ നാടോ ഏതാണെന്നുപോലും അറിയില്ല. തുടര്ന്ന് സാമൂഹ്യ പ്രവര്ത്തകനായ ഗണേശ് യുവാവിനെ തേവലക്കരയിലുള്ള അഭയകേന്ദ്രത്തില് എത്തിക്കുകയായിരുന്നു.
യുവാവിനെ പറ്റിയുള്ള അന്വേഷണത്തിനിടയിലാണ് സോഷ്യല് മീഡിയയില് കാണാതായ യുവാവിനെ അന്വേഷിച്ചുള്ള ബന്ധുക്കളുടെ പോസ്റ്റ് സാമൂഹ്യപ്രവര്ത്തകര്ക്ക് കിട്ടുന്നത്. കഴിഞ്ഞ ദിവസം സഹോദരന് മഹേഷ്, നൂറനാട് പോലീസ് ഓഫീസര് ഷാനവാസ് എന്നിവര് അഭയകേന്ദ്രത്തില് എത്തി യുവാവിനെ ഏറ്റെടുത്തു. കഴിഞ്ഞ 13നാണ് സത്യനെ വീട്ടില് നിന്നും കാണാതായത്. ബന്ധുക്കള് നൂറനാട് പോലീസില് പരാതി നല്കി അന്വേഷണം നടക്കുന്നതിനിടയിലാണ് സാമൂഹ്യ പ്രവര്ത്തകരുടെ വിളി എത്തിയത്.
