പദ്മശ്രീയില്‍ മലയാളി തിളക്കം; പി. നാരായണക്കുറുപ്പും, ശങ്കരനാരായണന്‍ മേനോന്‍ ചുണ്ടയിലും, ശോശാമ്മ ഐപ്പും, കെ.വി. റാബിയയും പുരസ്‌കാര നിറവില്‍

ന്യൂദല്‍ഹി: പദ്മശ്രീയില്‍ മലയാളി തിളക്കം. നാല് മലയാളികള്‍ക്കാണ് പത്മശ്രീ പുരസ്‌കാരം ലഭിച്ചത്.കവി പി.നാരായണകുറുപ്പ്, കളരിയാശാന്‍ ശങ്കരനാരായണ മേനോന്‍ ചുണ്ടിയില്‍, വെച്ചൂര്‍ പശുക്കളെ സംരക്ഷിക്കുന്ന ശോശാമ്മ ഐപ്പ്, സാമൂഹിക പ്രവര്‍ത്തക കെ.വി.റാബിയ എന്നിവരാണ് പത്മശ്രീ നേടിയ മലയാളികള്‍.

ടോക്യേ ഒളിമ്പിക്‌സില്‍ ജാവലിന്‍ ത്രോയില്‍ സ്വര്‍ണം നേടി ചരിത്രം സൃഷ്ടിച്ച് നീരജ് ചോപ്രയ്‌ക്കും പത്മശ്രീ നല്‍കും.

ഹെലികോപ്ടര്‍ അപകടത്തില്‍ വീരമൃത്യുവരിച്ച സംയുക്ത സൈനിക മേധാവി ജനറല്‍ ബിപിന്‍ റാവത്ത്, യുപി മുന്‍ മുഖ്യമന്ത്രിയും ബിജെപി നേതാവുമായ കല്യാണ്‍ സിങ്, സാഹിത്യകാരന്‍ രാധേശ്യാം ഖേംക (മരണാനന്തര ബഹുമതി), പ്രഭാ ആത്ര എന്നിവര്‍ക്ക് പദ്മവിഭൂഷണ്‍ നല്‍കും. പദ്മഭൂഷണ്‍ പുരസ്‌കാരത്തിന് 17 പേരും പദ്മശ്രീ പുരസ്‌കാരത്തിന് 107 പേരും അര്‍ഹരായി.

മുന്‍കേന്ദ്രമന്ത്രിയും കോണ്‍ഗ്രസ് നേതാവുമായ ഗുലാം നബി ആസാദ്, പശ്ചിമബംഗാള്‍ മുന്‍ മുഖ്യമന്ത്രിയും സിപിഎം നേതാവുമായ ബുദ്ധദേവ് ഭട്ടാചാര്യ, ഭാരത് ബയോടെക് മേധാവിമാരായ കൃഷ്ണ എല്ല, സുചി ത്ര എല്ല, മൈക്രോസോഫ്റ്റ് സിഇഒ സത്യ സത്യനാരായണ നാദെല്ല, സുന്ദരന്‍ പിച്ചെ, സൈറസ് പൂനെവാലെ, പ്രതിഭ റേ, സ്വാമി സച്ചിദാനന്ദ്, വസിഷ്ഠ് ത്രിപദി, എന്‍. ചന്ദ്രശേഖരന്‍, വിക്ടര്‍ ബാനര്‍ജി, മധുര്‍ ജഫ്രി, ദേവേന്ദ്ര ജഹാരിയ, റാഷിദ് ഖാന്‍, രാജീവ് മെഹര്‍ഷി, എന്നിവര്‍ പദ്മഭൂഷണ് തെരഞ്ഞെടുക്കപ്പെട്ടു. ഗുര്‍മീത് ബാവ, സഞ്ജയ് രാജാറാം എന്നിവര്‍ക്ക് മരണാനന്തര ബഹുമതിയായും പദ്മഭൂഷണ്‍ നല്‍കും.

രാജ്യത്തെ പരമോന്നത സിവിലിയന്‍ അവാര്‍ഡുകളിലൊന്നായ പത്മ പുരസ്‌കാരങ്ങള്‍, പത്മവിഭൂഷണ്‍, പത്മഭൂഷണ്‍, പത്മശ്രീ എന്നിങ്ങനെ മൂന്ന് വിഭാഗങ്ങളിലായി നല്‍കപ്പെടുന്നു. കല, സാമൂഹിക പ്രവര്‍ത്തനം, പൊതുകാര്യങ്ങള്‍, ശാസ്ത്രം, എഞ്ചിനീയറിംഗ്, വ്യാപാരം, വ്യവസായം, വൈദ്യശാസ്ത്രം, സാഹിത്യം, വിദ്യാഭ്യാസം, കായികം, സിവില്‍ സര്‍വീസ് തുടങ്ങിയ വിവിധ വിഷയങ്ങളില്‍/ പ്രവര്‍ത്തന മേഖലകളിലാണ് അവാര്‍ഡുകള്‍ നല്‍കുന്നത്.  അസാധാരണവും വിശിഷ്ടവുമായ സേവനത്തിന് ‘പത്മവിഭൂഷണ്‍’ പുരസ്‌കാരം നല്‍കുന്നു.  ഉന്നതമായ സ്തുത്യര്‍ഹ സേവനത്തിന് ‘പത്മഭൂഷണും, ഏത് മേഖലയിലെയും വിശിഷ്ട സേവനത്തിന് ‘പത്മശ്രീ’യും നല്‍കുന്നു.  എല്ലാ വര്‍ഷവും റിപ്പബ്ലിക് ദിനത്തോടനുബന്ധിച്ചാണ് അവാര്‍ഡുകള്‍ പ്രഖ്യാപിക്കുന്നത്.

 എല്ലാ വര്‍ഷവും മാര്‍ച്ച്/ഏപ്രില്‍ മാസങ്ങളില്‍ രാഷ്‌ട്രപതിഭവനില്‍ നടക്കുന്ന ചടങ്ങുകളില്‍  രാഷ്‌ട്രപതിയാണ്  അവാര്‍ഡുകള്‍ നല്‍കുന്നത്. ഈ വര്‍ഷം  128 പത്മ അവാര്‍ഡുകള്‍ രാഷ്‌ട്രപതി അംഗീകരിച്ചു.  പത്മവിഭൂഷണ്‍, 17 പത്മഭൂഷണ്‍, 107 പത്മശ്രീ അവാര്‍ഡുകള്‍ എന്നിവ ഉള്‍പ്പെടുന്നു. അവാര്‍ഡിന് അര്‍ഹരായവരില്‍ 34 പേര്‍ വനിതകളാണ്, വിദേശികള്‍/എന്‍ആര്‍ഐ/പിഐഒ/ഒസിഐ വിഭാഗത്തില്‍ നിന്നുള്ള 10 പേരും മരണാനന്തര പുരസ്‌കാര ജേതാക്കളായ 13 പേരും പട്ടികയില്‍ ഉള്‍പ്പെടുന്നു