കോട്ടയം: കോട്ടയത്തെ കടുത്തുരുത്തി ഞീഴൂര് പഞ്ചായത്തിലെ തോട്ടക്കുറ്റിയില് സര്വ്വേകല്ലിടാന് വന്ന ഉദ്യോഗസ്ഥര്ക്കെതിരെ നാട്ടുകാരുടെ പ്രതിഷേധം. കല്ലിടാന് വന്ന ഉദ്യോഗസ്ഥരുടെ വാഹനങ്ങള് തടഞ്ഞുകൊണ്ടായിരുന്നു പ്രതിഷേധം. ഉദ്യോഗസ്ഥര് സര്വ്വേക്കല്ലുകള് നിറച്ച പിക്കപ്പുമായാണ് എത്തിയത്. ഞീഴൂരിലെ വെളിയംകോട് ഭാഗത്ത് സര്വ്വേക്കല്ല് സ്ഥാപിക്കുന്നതിനെതിരെയാണ് നാട്ടുകാര് പ്രതിഷേധവുമായി എത്തിയത്.
വാഹനത്തിന് മുന്നില് പ്രതിഷേധക്കാര് വഴിമുടക്കി കിടന്നതോടെ ഉദ്യോഗസ്ഥര് കല്ലിടാതെ മടങ്ങി. കെ-റെയില് വിരുദ്ധ സമരസമിതിയായിരുന്നും സമരത്തിന് നേതൃത്വം നല്കിയത്. വിവിധ രാഷ്ട്രീയപാര്ട്ടികളും പിന്നീട് പ്രതിഷേധത്തില് പങ്കെടുത്തു. രാവിലെ നടന്ന സമരം മോന്സ് ജോസഫ് എംഎല്എ ഉദ്ഘാടനം ചെയ്തിരുന്നു.
സംഘര്ഷമുണ്ടാകുമെന്ന് മുന്നറിയിപ്പ് ലഭിച്ചതിനെ തുടര്ന്ന് നാല് ജീപ്പ് പൊലീസുകാരും പ്രതിഷേധ സ്ഥലത്ത് എത്തിയിരുന്നു. പക്ഷെ പൊലീസുകാര് ബലപ്രയോഗത്തിന് മുതിര്ന്നില്ല.
