ഗാന്ധിനഗര്‍: കോട്ടയം മെഡിക്കല്‍ കോളജില്‍ അത്യാധുനിക പൊള്ളല്‍ ചികിത്സാകേന്ദ്രം തുടങ്ങി. ദക്ഷിണേന്ത്യയില്‍ തന്നെ സര്‍ക്കാര്‍ ആശുപത്രികളില്‍ ആദ്യത്തെ സംരംഭമാണ് കോട്ടയം മെഡിക്കല്‍ കോളജില്‍ ആരംഭിച്ചത്.
മുന്‍പ് 35 ശതമാനം വരെ പൊള്ളലേറ്റ് വരുന്ന രോഗികളെ ചികത്സിച്ചു ഭേദമാക്കുവാന്‍ കഴിഞ്ഞിരുന്നു. ആധുനിക സംവിധാനങ്ങളോടെ പ്രവര്‍ത്തിക്കുന്ന പുതിയ പൊള്ളല്‍ ചികിത്സാ കേന്ദ്രത്തില്‍ 85 ശതമാനം വരെ പൊളളലേറ്റു വരുന്ന രോഗികളെയും ചികിത്സിച്ചു ഭേദമാക്കുവാന്‍ കഴിയും. അത്യാഹിത വിഭാഗം കെട്ടിടത്തിന്റെ അഞ്ചാം നിലയിലാണ് പൊള്ളല്‍ വിഭാഗം പ്രവര്‍ത്തിക്കുന്നത്. ഇതോടനുബന്ധിച്ച് ശസ്ത്രക്രിയാ മുറി, വെന്റിലേറ്റര്‍ സൗകര്യം, ജനറല്‍ വാര്‍ഡ്, തീവ്രപരിചരണ വിഭാഗം, രോഗികള്‍ക്കുതകുന്ന രീതിയിലുള്ള ശൗചാലയം എന്നിവയും സജ്ജീകരിച്ചിട്ടുണ്ട്. അത്യാധുനിക സൗകര്യങ്ങളോടെ 5 കിടക്കകളാണ് ഇപ്പോഴുള്ളത്.
പൊള്ളലേറ്റു വരുന്ന രോഗികളെ ആദ്യം ജനറല്‍ വാര്‍ഡില്‍ പ്രവേശിപ്പിക്കും. തുടര്‍ന്ന് പരിശോധനയിലൂടെ രോഗിയുടെ പൊള്ളലിന്റെ തീവ്രതയനുസരിച്ചുള്ള ചികിത്സയാണു നല്‍കുന്നത്. രോഗിയുടെ ശരീരത്തില്‍ സ്പര്‍ശിക്കാതെ തന്നെ ദേഹശുചീകരണത്തിനുള്ള സംവിധാനവും ഉണ്ട്. വെള്ളത്തിന്റെ താപനില ക്രമീകരിക്കുവാനും കഴിയും. ഇതോടനുബന്ധിച്ച് ത്വക്ക് ബാങ്ക്, രക്ത ബാങ്ക്, കൃത്രിമ അവയവ നിര്‍മ്മാണം, എന്നിവ കൂടി വന്നാല്‍ പ്രവര്‍ത്തനം പൂര്‍ണ തോതിലാകും.
പൊള്ളല്‍ ചികിത്സാ കേന്ദ്രത്തിന്റെ ഉദ്ഘാടനം സൂപ്രണ്ട് ഡോ. ടി.കെ ജയകുമാര്‍ നിര്‍വ്വഹിച്ചു. പ്ലാസ്റ്റിക് സര്‍ജറി മേധാവി ഡോ. ലക്ഷ്മി, ആര്‍എംഒ ഡോ. ആര്‍.പി രഞ്ജിന്‍ എന്നിവര്‍ പ്രസംഗിച്ചു.
പ്രതികരിക്കാൻ ഇവിടെ എഴുതുക: