ന്യൂദല്ഹി: ബെംഗളൂരു വിമാനത്താവളത്തില് നിന്നു പറന്നുയര്ന്നതിനു പിന്നാലെ, രണ്ട് ഇന്ഡിഗോ വിമാനങ്ങള് തമ്മിലുള്ള കൂട്ടിയിടി ഒഴിവായതു തലനാരിഴയ്ക്ക.് ഏവിയേഷന് റെഗുലേറ്റര് ഡയറക്ടറേറ്റ് ജനറല് ഓഫ് സിവില് ഏവിയേഷന് അധികൃതരാണ് ഇക്കാര്യം അറിയിച്ചത്.
ബെംഗളൂരു-കൊല്ക്കത്ത 6ഇ455 വിമാനവും, ബെംഗളൂരു-ഭുവനേശ്വര് 6ഇ246 വിമാനവുമാണു ‘ബ്രീച്ച് ഓഫ് സെപ്പറേഷന്’ മറികടന്നതെന്നു ഡിജിസിഎ അധികൃതര് അറിയിച്ചു. എയര്സ്പേസില്വച്ച് തമ്മില് പാലിക്കേണ്ട നിശ്ചിത അകലം വിമാനങ്ങള് മറികടക്കുമ്പോഴാണു ബ്രീച്ച് ഓഫ് സെപ്പറേഷന് ഉണ്ടാകുന്നത്. ജനുവരി ഒന്പതിന്, അഞ്ച് മിനിറ്റിന്റെ വ്യത്യാസത്തിനിടെയാണ് ഇരു വിമാനങ്ങളും ബെംഗളൂരുവില് നിന്നു പറന്നുയര്ന്നത്. ‘ടേക്ക് ഓഫിനു ശേഷം ഇരു വിമാനങ്ങളും ഒരേ ദിശയിലാണു സഞ്ചരിച്ചത്. ഗതി മാറി സഞ്ചരിക്കാനുള്ള നിര്ദേശം അപ്രോച്ച് റഡാര് നല്കിയതോടെയാണു കൂട്ടിയിടി ഒഴിവായതെന്നും അധികൃതരില് അറിയിച്ചു.
സംഭവത്തെ കുറിച്ച് രേഖകളില് ഉള്പ്പെടുത്തിയിട്ടില്ലെന്നും എയര്പോര്ട്സ് അതോറിറ്റി ഓഫ് ഇന്ത്യയ്ക്കു മുന്പാകെ ബോധിപ്പിച്ചിട്ടില്ലെന്നും അധികൃതര് അറിയിച്ചു. അതേ സമയം, വിഷയം പരിശോധിച്ചു വരികയാണെന്നും കുറ്റക്കാര്ക്കെതിരെ കര്ശന നടപടി ഉണ്ടാകുമെന്നും ഡിജിസിഎ മേധാവി അരുണ് കുമാര് വാര്ത്താ ഏജന്സിയായ പിടിഐയോടു പറഞ്ഞു. ഇതേക്കുറിച്ചുള്ള പ്രതികരണത്തിന് ഇന്ഡിഗോ അധികൃതറും ഇതുവരെ തയാറായിട്ടില്ല.
