തിരുവന്നതപുരം: സംസ്ഥാനത്ത് കോവിഡ് മൂന്നാം തരംഗവും അതിതീവ്ര വ്യാപനവും സ്ഥിരീകരിച്ച് സര്ക്കാര്. സംസ്ഥാനം നേരിടുന്നത് കൊവിഡ് മൂന്നാം തരംഗമാണെന്ന് ആരോഗ്യമന്ത്രി വീണാ ജോര്ജ്. രോഗ വ്യാപനം തുടക്കത്തില് തന്നെ തീവ്ര വ്യാപനത്തിലേക്ക് കടന്നിരിക്കുകയാണ് എന്നും ആരോഗ്യമന്ത്രി ചൂണ്ടിക്കാട്ടി. ഒന്നിച്ച് നിന്ന് അതിജീവിക്കാന് ജനങ്ങള് സഹകരിക്കണമെന്നും മന്ത്രി ആവശ്യപ്പെട്ടു. ഒമിക്രോണ് പ്രചരിക്കുന്നത് പോലെ നിസാരമല്ല. കടുത്ത ജാഗ്രത വേണം. ഡെല്റ്റയേക്കാള് അഞ്ചോ ആറോ ഇരട്ടി വ്യാപനമാണ് ഒമിക്രോണിന് ഉണ്ടാകുന്നത്. ഡെല്റ്റയില് മണവും രുചിയും നഷ്ടപ്പെടുന്ന സാഹചര്യം ഉണ്ടായിരുന്നു. എന്നാല് ഒമിക്രോണില് ഈ അവസ്ഥയുണ്ടാവുന്നില്ലെന്നും മന്ത്രി പറയുന്നു.
രോഗികളുടെ എണ്ണം കൂടിയാല് ആശുപത്രി, ഐസിയു രോഗികള് വര്ധിക്കുന്ന അവസ്ഥയുണ്ടാവും. അതിനാല് ആശുപത്രികളില് രോഗികള്ക്കൊപ്പം ഉള്പ്പെടെ കുറഞ്ഞ ആളുകള് മാത്രം എത്താന് ശ്രദ്ധിക്കണം. അനാവശ്യ സന്ദര്ശനങ്ങള് ഒഴിവാക്കണം. ഇതോടൊപ്പം സ്ഥാപനങ്ങള് ക്ലസ്റ്റര് കേന്ദ്രങ്ങളാകുന്ന സാഹചര്യം ഒഴിവാക്കണം. പൊതു സ്വകാര്യ സ്ഥാപനങ്ങള് ഇക്കാര്യം ശ്രദ്ധിക്കണമെന്നും ആരോഗ്യമന്ത്രി ചൂണ്ടിക്കാട്ടി. രോഗത്തെ പ്രതിരോധിക്കാന് എല്ലാവരും വാക്സിന് സ്വീകരിക്കണം. വാക്സിനേഷന് എതിരായ വാര്ത്തകള് ശരിയല്ലെന്നും മന്ത്രി ചൂണ്ടിക്കാട്ടി.
പനിയുള്ളവര് ജാഗ്രത പാലിക്കണം സംസ്ഥാനത്തെ രോഗബാധ അതിതീവ്ര ഘട്ടത്തിലേക്ക് കടന്നു കഴിഞ്ഞു. കരുതലോടെ നേരിടേണ്ട അവസ്ഥയാണ്. രാഷ്ട്രീയ കക്ഷിഭേദമന്യേ ഒരുമിച്ച് നില്ക്കേണ്ട സമയമാണെന്നും മന്ത്രി.
