തിരുവനന്തപുരം: നടന് ഉണ്ണി മുകുന്ദന് നായകനായും നിര്മാതാവായുമുള്ള മേപ്പടിയാന് തിയെറ്ററുകളില് സൂപ്പര്ഹിറ്റായി മാറുന്നതിനിടെ ചിത്രത്തിനെതിരേ വ്യാജവാര്ത്തകളും വിദ്വേഷ പ്രചരണവുമായി മതമൗലിക വാദികള്. ചിത്രത്തിന്റെ പേരില് വ്യാജ വിക്കി പീഡിയ പേജ് ഉണ്ടാക്കിയാണ് മതവിദ്വേഷം വളര്ത്തുന്ന തരത്തിലുള്ള വിവരങ്ങള് ഉള്പ്പെടുത്തി സോഷ്യല് മീഡിയയില് പ്രചരിപ്പിക്കുന്നത്. നേരത്തേ, ചിത്രത്തില് സേവാഭാരതിയുടെ ആംബുലന്സ് കാട്ടിയെന്ന് പറഞ്ഞു വലിയ വിദ്വേഷ പ്രചരണം നടന്നിരുന്നു. ഇതു ഏല്ക്കാതെ വന്നതോടെയാണ് വ്യാജ വിക്കി പീഡിയ പേജ് പ്രചാരണം.
ഇതോടെയാണ് വ്യാജ പ്രചരണത്തിന് മറുപടിയുമായി നടന് ഉണ്ണി മുകുന്ദന് രംഗത്തെത്തിയത്. ‘മേപ്പടിയാന്’ തീര്ത്തും ഒരു കുടുംബ ചിത്രമാണെന്നും ഒരു സാധാരണക്കാരന്റെ നിത്യജീവിതത്തില് സംഭവിക്കുന്ന പ്രശ്നങ്ങളുടെ നേര്കാഴ്ചയാണെന്നും ഉണ്ണി മുകുന്ദന് പറയുന്നു. സിനിമയ്ക്കെതിരെ വരുന്ന വിദ്വേഷ പ്രചരണങ്ങളില് വിശ്വസിക്കരുത് എന്നും ഉണ്ണി വ്യക്തമാക്കി. ഇന്സ്റ്റാഗ്രാമിലൂടെ ചിത്രത്തിനെതിരെ വന്ന വാര്ത്തയുടെ സ്ക്രീന് റെക്കോര്ഡുകള് പങ്കുവച്ചാണ് താരത്തിന്റെ മറുപടി. മേപ്പടിയാന് തികച്ചും ഒരു കുടുംബ ചിത്രമാണ്. ഒരു സാധാരണ മനുഷ്യന് അയാളുടെ ദൈനംദിന ജീവിതത്തില് അഭിമുഖീകരിക്കുന്ന പോരാട്ടങ്ങളാണ് ചിത്രത്തില് അവതരിപ്പിക്കുന്നത്. എന്നാല് ഇതുപോലുള്ള തിരുത്തലുകളും വിദ്വേഷ പ്രചരണങ്ങളും തികച്ചും അനാവശ്യമാണ്. ഈ സിനിമ എന്താണ് പറയുന്നതെന്നറിയാന് നിങ്ങളത് കാണുക- ഉണ്ണി മുകുന്ദന് കുറിച്ചു.
നേരത്തേ, സിനിമയ്ക്കെതിരെ നടക്കുന്ന സോഷ്യല് മീഡിയ പ്രചാരണങ്ങള്ക്ക് മറുപടി നല്കി സംവിധായകന് വിഷ്ണു മോഹനും രംഗത്തെത്തിയിരുന്നു. സിനിമയില് സേവാഭാരതിയുടെ ആംബുലന്സ് ഉപയോഗിച്ചതിനെതിരെയാണ് ആളുകള് പ്രചാരണം നടത്തുന്നത്. എന്നാല് കൊറോണ കാലത്ത് ആംബുലന്സ് ലഭിക്കാന് ബുദ്ധിമുട്ടുണ്ടായപ്പോള് സേവാഭാരതിയാണ് അന്ന് സൗജന്യമായി ആംബുലന്സ് നല്കിയത് എന്ന് സംവിധായകന് പറഞ്ഞു.
സേവാഭാരതി ഇന്ത്യയിലെ ഏറ്റവും വലിയ അറിയപ്പെടുന്ന എന്ജിഒ ആണ്. അത് ബ്ലാക്ക് ലിസ്റ്റിലുള്ള സംഘടനയല്ലെന്നും ഉപയോഗിക്കുന്നതില് തെറ്റില്ലെന്നും അദ്ദേഹം പറഞ്ഞു. കേരളത്തില് ഒഴിച്ചുകൂടാനാവാത്ത സംഘടനയാണ് സേവാഭാരതി. പോലീസും ഫയര്ഫോഴ്സും കഴിഞ്ഞാല് എന്തിനും അവര് മുന്നിലെത്താറുണ്ടെന്നും അവരെ ഒഴിച്ചുനിര്ത്തി എങ്ങനെ സിനിമ ചെയ്യാന് സാധിക്കുമെന്നും വിഷ്ണു മോഹന് ചോദിച്ചു.
