എരുമേലി: പമ്പാനദിയില്‍ വെള്ളം കുറഞ്ഞതോടെ നദി കയറിവരുന്ന കാട്ടാനകള്‍ വ്യാപകമായി കൃഷി നശിപ്പിക്കുന്നതായി പരാതി . പമ്പാവാലി മൂലക്കയം മേഖലയിലാണ് കാട്ടാനക്കൂട്ടം ജനവാസ മേഖലയില്‍ ഇറങ്ങി കൃഷി നശിപ്പിക്കുന്നത്.
കഴിഞ്ഞദിവസം രാത്രിയില്‍ ഇറങ്ങിയ കാട്ടാനകള്‍ നിരവധി പേരുടെ കൃഷികളാണ് നശിപ്പിച്ചത്. അജോ പുരയിടത്തില്‍, പൊടിയന്‍ വലിയപറമ്പില്‍, ജോര്‍ജ്ജുകുട്ടി, റോയ് എന്നിവരുടെ കൃഷിയിടങ്ങളിലാണ് കാട്ടാനക്കൂട്ടം ഇറങ്ങിയത്.
തെങ്ങ്, വാഴ, റബ്ബര്‍, കമുങ്ങ് അടക്കം വരുന്ന ചെറുകിട കൃഷികള്‍ എല്ലാം നശിപ്പിച്ചു. ശബരിമല വനാതിര്‍ത്തി മേഖലയില്‍ നിന്നും വരുന്ന കാട്ടാനക്കൂട്ടം പമ്പാനദിയില്‍ വെള്ളം കുറഞ്ഞ ഭാഗം നോക്കിയാണ് ജനവാസ കേന്ദ്രങ്ങളിലേക്ക് കയറുന്നത്. എന്നാല്‍ വനാതിര്‍ത്തിയില്‍ സോളാര്‍ ഫെന്‍സിങ് വേലികള്‍ സ്ഥാപിച്ചിട്ടുണ്ടെങ്കിലും ഇത് തകര്‍ത്താണ് കാട്ടാനകള്‍ ഇറങ്ങുന്നതെന്നും നാട്ടുകാര്‍ പറഞ്ഞു: അടിയന്തരമായി നടപടി സ്വീകരിക്കണമെന്ന് കര്‍ഷകര്‍ ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: