ലഖ്നോ: ഉത്തര്പ്രദേശില് കോണ്ഗ്രസ്, സമാജ് വാദി പാര്ട്ടി എംഎല്എമാര് ബുധനാഴ്ച ബിജെപിയില് ചേര്ന്നു. കോണ്ഗ്രസ് എംഎല്എ നരേഷ് സെയ്നി, സമാജ് വാദി പാര്ട്ടി എംഎല്എ ഹരിഓം യാദവ്, മുന് സമാജ് വാദി എംഎല്എ ധര്മ്മപാല് യാദവ് എന്നിവരാണ് ബിജെപിയില് ചേര്ന്നത്.
ദല്ഹിയില് മുതിര്ന്ന ബിജെപി നേതാക്കള് കൂടി പങ്കെടുത്ത ചടങ്ങിലാണ് ഇവര് ബിജെപിയില് ചേര്ന്നത്. ഉത്തര്പ്രദേശിലെ ബെഹത്ത് നിയമസഭാ മണ്ഡലത്തിലെ കോണ്ഗ്രസ് എംഎല്എയാണ് നരേഷ് സെയ്നി. ഫിറോസാബാദിലെ സിര്സഗഞ്ജ് മണ്ഡലത്തില് നിന്നുള്ള എംഎല്എയാണ് ഹരി ഓം യാദവ്. സമാജ് വാദി പാര്ട്ടിയുടെ മുന് എംഎല്എയായ ധര്മ്മപാല് യാദവാണ് ബിജെപിയിലേക്ക് മാറിയ മറ്റൊരു നേതാവ്.
കഴിഞ്ഞ ദിവസം യോഗി ആദിത്യനാഥ് മന്ത്രിസഭയിലെ മന്ത്രിയായ സ്വാമി പ്രസാദ് മൗര്യ ബിജെപി വിട്ട് സമാജ് വാദി പാര്ട്ടിയിലേക്ക് പോയ തിരിച്ചടിക്ക് ബുധനാഴ്ച ബിജെപി പകരം വീട്ടുകയായിരുന്നു.
