ജൊഹാന്നസ്ബര്‍ഗ്: ക്രിക്കറ്റിന്റെ എല്ലാ ഫോര്‍മാറ്റുകളില്‍ നിന്നും വിരമിക്കല്‍ പ്രഖ്യാപിച്ച് ദക്ഷിണാഫ്രിക്കന്‍ ഓള്‍റൗണ്ടര്‍ ക്രിസ് മോറിസ്. ഇന്‍സ്റ്റഗ്രാം അക്കൗണ്ടിലൂടെയാണ് വിരമിക്കല്‍ പ്രഖ്യാപനം നടത്തിയത്. ദക്ഷിണാഫ്രിക്കന്‍ പ്രീമിയര്‍ ലീഗ് ടീമായ ടൈറ്റന്‍സിന്റെ പരിശീലകനായി ചുമതലയേല്‍ക്കുമെന്നും താരം അറിയിച്ചു.
ക്രിക്കറ്റിന്റെ എല്ലാ ഫോര്‍മാറ്റില്‍ നിന്നും വിരമിക്കുകയാണ്. ഈ യാത്രയില്‍ സഹായിച്ച എല്ലാവര്‍ക്കും നന്ദി. രസകരമായ യാത്രയായിരുന്നു ഇത്. ടൈറ്റന്‍സിന്റെ പരിശീലക സ്ഥാനം ഏറ്റെടുക്കുകയാണെന്നും മോറിസ് ഇന്‍സ്റ്റഗ്രാം പേജില്‍ കുറിച്ചു. 2016ല്‍ ടെസ്റ്റ് ക്രിക്കറ്റില്‍ അരേങ്ങറ്റം കുറിച്ച താരം 173 റണ്‍സും 12 വിക്കറ്റുകളും നേടി. ദക്ഷിണാഫ്രിയ്‌ക്കക്കായി 42 ഏകദിന മത്സരങ്ങളില്‍ നിന്നും 467 റണ്‍സും 48 വിക്കറ്റുകളും 23 ട്വന്റി20 മത്സരങ്ങളില്‍ നിന്ന് 133 റണ്‍സും 34 വിക്കറ്റുകളും നേടിയിട്ടുണ്ട്.
ഐപിഎല്ലില്‍ രാജസ്ഥാന്‍ റോയല്‍സ്, ദല്‍ഹി ക്യാപ്പിറ്റല്‍സ്, റോയല്‍ ചലഞ്ചേഴ്‌സ് ബെംഗളൂരു, ചെന്നൈ സൂപ്പര്‍ കിങ്‌സ് ടീമുകള്‍ക്കായും കളിച്ചിട്ടുണ്ട്. 2021ല്‍ 16 കോടി രൂപയ്‌ക്കാണ് രാജസ്ഥാന്‍ റോയല്‍സ് താരത്തെ സ്വന്തമാക്കിയത്.
പ്രതികരിക്കാൻ ഇവിടെ എഴുതുക: