കോട്ടയം: കൊവിഡ് പ്രതിരോധ വാക്സിന്റെ രണ്ട് ഡോസ് എടുത്തവര്‍ കരുതല്‍ ഡോസുകൂടി എടുക്കാന്‍ ശ്രദ്ധിക്കണമെന്ന് സുപ്രീം കോടതി മുന്‍ ജഡ്ജി ജസ്റ്റിസ് കെ.ടി. തോമസ് പറഞ്ഞു. മന്ത്രി വി.എന്‍. വാസവനോടൊപ്പം കോട്ടയം ജനറല്‍ ആശുപത്രിയിലെത്തി ജില്ലയിലെ ആദ്യ ഡോസ് കരുതല്‍ വാക്സിന് സ്വീകരിച്ചശേഷം സംസാരിക്കുകയായിരുന്നു അദ്ദേഹം. വാക്സിനെടുത്തവര്‍ക്ക് കൊവിഡ് വന്നാല്‍ തന്നെ ചെറിയ പനിയോ ജലദോഷമോ മാത്രമേ വരുന്നുള്ളൂ. ഭാര്യയ്‌ക്ക് കോവിഡ് വന്നിട്ടും എന്നെ ബാധിച്ചില്ല. വാക്സിന് ഫലപ്രദമാണ്. എല്ലാവരും കരുതല്‍ ഡോസ് സ്വീകരിക്കണമെന്നും അദ്ദേഹം പറഞ്ഞു.
മന്ത്രിയാണ് ആദ്യം വാക്സിന് സ്വീകരിച്ചത്. തുടര്‍ന്ന് ജസ്റ്റിസ് കെ.ടി. തോമസും വാക്സിന് സ്വീകരിച്ചു. കോവിഷീല്‍ഡ് വാക്സിനാണ് ഇരുവരും സ്വീകരിച്ചത്. ആര്‍സിഎച്ച് ഓഫീസര്‍ ഡോ. സി.ജെ. സിതാര, ജനറല്‍ ആശുപത്രിയിലെ വാക്സിനേഷന്റെ ചാര്‍ജ് ഓഫീസര്‍ ഡോ. ലിന്റോ ലാസര്‍, ജില്ലാ ഇന്‍ഫര്‍മേഷന്‍ ഓഫീസര്‍ എ. അരുണ്‍ കുമാര്‍, ജില്ലാ മാസ് മീഡിയ ഓഫീസര്‍ ജെ. ഡോമി എന്നിവര്‍ സന്നിഹിതരായിരുന്നു.
ജില്ലയില്‍ 2,56,950 ഡോസ് വാക്സിന് സ്റ്റോക്കുള്ളതായി ആര്‍സിഎച്ച് ഓഫീസര്‍ ഡോ. സി.ജെ. സിതാര പറഞ്ഞു. ആരോഗ്യ പ്രവര്‍ത്തകര്‍, കൊവിഡ് മുന്നണിപ്പോരാളികള്‍, ഇതര രോഗങ്ങളുള്ള മുതിര്‍ന്നവര്‍ (60 വയസിനു മുകളില്‍ പ്രായമുള്ളവര്‍) എന്നിവര്‍ക്കാണ് കരുതല്‍ വാക്സിന് നല്‍കുക. ആദ്യ ദിനം ജില്ലയില്‍ 29 കേന്ദ്രങ്ങളിലാണ് മൂന്നാം ഡോസ് വാക്സിന് നല്‍കുന്നത്. രണ്ടാം ഡോസ് വാക്സിന് സ്വീകരിച്ച് ഒമ്പതു മാസം (39 ആഴ്‌ച്ച) പിന്നിട്ട ഈ വിഭാഗങ്ങളിലുള്ളവരാണ് മൂന്നാം ഡോസിന് അര്‍ഹരാവുക. മുന്‍കരുതല്‍ ഡോസ് സ്വീകരിക്കുന്നതിന് ഡോക്ടറുടെ സര്‍ട്ടിഫിക്കറ്റോ മറ്റു രേഖകളോ ഹാജരാക്കേണ്ടതില്ല. കൂടാതെ കോവിഷീല്‍ഡ് രണ്ടാം ഡോസിനു അര്‍ഹരായവര്‍ക്കും ഒന്നാം ഡോസ് ഇതുവരെ സ്വീകരിക്കാത്തവര്‍ക്കും ഇതേ കേന്ദ്രങ്ങളില്‍ വാക്സിന് സ്വീകരിക്കാവുന്നതാണ്.
പ്രതികരിക്കാൻ ഇവിടെ എഴുതുക: