ന്യൂയോര്ക്ക്: വൈദ്യശാസ്ത്ര രംഗത്ത് വിപ്ലവം സൃഷ്ടിക്കാവുന്ന ചികിത്സാരീതിയുമായി അമേരിക്കയിലെ ഡോക്റ്റര്മാര്. ജനിതക മാറ്റം വരുത്തിയ പന്നിയുടെ ഹൃദയം മനുഷ്യനില് വച്ചുപിടിപ്പിച്ച് കൊണ്ടാണ് വൈദ്യശാസ്ത്ര രംഗത്ത് പുതു ചരിത്രം സൃഷ്ടിക്കുന്നത്. അമേരിക്കയിലെ മേരിലാന്ഡ് മെഡിസിന് യൂണിവേഴ്സിറ്റിയിലാണ് ഹൃദയ ശസ്ത്രക്രിയ രംഗത്ത് പുതിയ ചുവടുവെപ്പ്. മേരിലാന്ഡ് സ്വദേശിയായ ഡേവിഡ് ബെന്നറ്റ് എന്ന 57 കാരനിലാണ് ജനിതക മാറ്റം വരുത്തിയ പന്നിയുടെ ഹൃദയം വെച്ചു പിടിപ്പിച്ചിരിക്കുന്നത്.
ഡേവിഡ് ബെന്നറ്റ് കുറേ ദിവസങ്ങളായി ഹൃദ്രോഗത്തിനു ചികിത്സയിലായിരുന്നു. ശസ്ത്രക്രിയ നടത്താന് ഒരു മനുഷ്യഹൃദയത്തിനായി ഒരുപാട് ശ്രമിച്ചിരുന്നു. എന്നാല് അത് ലഭിക്കാത്ത സാഹചര്യത്തിലാണ് അവസാന ശ്രമമെന്ന നിലയില് പരീക്ഷണത്തിന് ശാസ്ത്രലോകം മുതിര്ന്നത്. ഏഴ് മണിക്കൂര് നീണ്ടുനിന്ന ശസ്ത്രക്രിയയിലൂടെയാണ് പന്നിയുടെ ഹൃദയം മനുഷ്യനില് വച്ചുപിടിപ്പിച്ചത്. ശസ്ത്രക്രിയക്ക് ശേഷം വെന്റിലേറ്റര് സഹായമില്ലാതെ ബെന്നറ്റ് സ്വന്തമായി ശ്വസിക്കുന്നുണ്ട്. നിലവില് ഇ.സി.എം.ഒ മെഷീന്റെ സഹായത്തോടെയാണ് പകുതിയോളം രക്തം പമ്പുചെയ്യുന്നത്. ഇത് പതുക്കെ പൂര്ണമായും ഒഴിവാക്കുമെന്നും ഡോക്ടര്മാര് പറഞ്ഞു.
ജനിതകമാറ്റം വരുത്തിയ മൃഗത്തിന്റെ ഹൃദയത്തിന് മനുഷ്യ ശരീരത്തില് ഉടനടി പ്രവര്ത്തിക്കാന് കഴിയുമെന്ന് പരീക്ഷണം തെളിയിച്ചതായി അധികൃതര് പറഞ്ഞു. അവയവം വച്ചുപിടിപ്പിക്കുന്നതില് ക്ഷാമം പരിഹരിക്കാനുള്ള പുതിയ ചുവടുവയ്പ്പാണിതെന്ന് ഡോക്ടര്മാരും മേരിലാന്ഡ് മെഡിക്കല് യൂണിവേഴ്സിറ്റി അധികൃതരും പറഞ്ഞു. ആരോഗ്യരംഗത്ത് ഏറെ നിര്ണായകമായ ശസ്ത്രക്രിയയാണ് നടന്നത്. അവയവ ദൗര്ലഭ്യം പരിഹരിക്കുന്നതില് ഈ നേട്ടം ഏറെ ഗുണകരമാകുമെന്നും ശസ്ത്രക്രിയക്ക് നേതൃത്വം നല്കിയ ഡോ. ബാര്ട്ട്ലി ഗ്രിഫിത് പറഞ്ഞു.
‘ഒന്നുകില് മരിക്കും. അല്ലെങ്കില് ഈ ശസ്ത്രക്രിയക്ക് വിധേയനാകും. എനിക്ക് ജീവിക്കണം. ഇതെന്റെ അവസാന ഊഴമാണ്’. എന്നാണ് ശസ്ത്രക്രിയക്ക് മുമ്പ് ഡേവിഡ് ബെന്നറ്റ് പറഞ്ഞത്. നിര്ണായകമായ ശസ്ത്രക്രിയ ആയതിനാല് ഇനിയുള്ള ദിവസങ്ങള് ഏറെ സങ്കീര്മാണ് ബെന്നറ്റിന്റെ ആരോഗ്യം സസൂക്ഷ്മം നിരീക്ഷിച്ച് വരികയാണെന്നും ഇതുവരെ ആരോഗ്യപരമായ പ്രശ്നങ്ങളൊന്നും ഉണ്ടായിട്ടില്ലെന്നും ഡോക്ടര്മാര് അറിയിച്ചു.
ഈ ശസ്ത്രക്രിയയുടെ വിജയം ഭാവിയില് ഇത്തരത്തില് നിരവധി ആളുകളുടെ ജീവന്രക്ഷിക്കുന്നതില് നിര്ണായകമായി മാറും എന്ന് മേരിലാന്ഡ് യൂണിവേഴ്സിറ്റി കാര്ഡിയാക് ക്സെനോട്രാന്സ്പ്ലാന്റേഷന് പ്രോഗ്രാമിന്റെ സഹസ്ഥാപകനായ ഡോ. മുഹമ്മദ് മൊഹിയുദ്ദീന് പറഞ്ഞു.
