കൊച്ചി : ഇടപ്പള്ളിയില്‍ വാഹനം മോഷ്ടിക്കാനുള്ള ശ്രമത്തിനിടെ എഎസ്‌ഐയെ കുത്തി പരിക്കേല്‍പ്പിച്ചത് നടിയെ ആക്രമിച്ച കേസിലെ പ്രതി വിഷ്ണു. ഇയാളുടെ വിളിപ്പേരാണ് ബിച്ചു. ദിലീപ് പ്രതിയായ നടിയെ ആക്രമിച്ച കേസില്‍ ക്വട്ടേഷന്‍ സംഘത്തിലെ പ്രതി സുനില്‍ കുമാറിന്റെ സഹ തടവുകാരനായിരുന്നു ഇയാള്‍.
കേസില്‍ ദിലീപിന്റെ പങ്കാളിത്തം പുറത്തുകൊണ്ടുവന്നതും വിഷ്ണുവാണ്. കാക്കനാട്ടെ ജയിലില്‍ വെച്ച് രണ്ട് കോടി ആവശ്യപ്പെട്ട് ദിലീപിന്റെ മാനേജര്‍ക്ക് പള്‍സര്‍ സുനി എഴുതിയ കത്ത് മാനേജര്‍ക്ക് നേരിട്ട് നല്‍കിയത് വിഷ്ണുവാണ്. കേസിലെ ദിലീപിന്റെ പങ്കിനെ പറ്റി വ്യക്തമായ തെളിവ് ലഭിച്ചത് ഈ കത്തില്‍ നിന്നാണ്.
ഇടപ്പള്ളി മെട്രോ സ്‌റ്റേഷന് സമീപത്ത് പാര്‍ക്ക് ചെയ്തിരുന്ന ബൈക്ക് മോഷ്ടിക്കാന്‍ ശ്രമിക്കുന്നതിനിടയിലാണ് ഡ്യൂട്ടിയിലായിരുന്ന എഎസ്‌ഐ വിഷ്ണുവിനെ പിടികൂടാന്‍ ശ്രമിക്കുന്നത്. ഇതോടെ എഎസ്‌ഐയെ കുത്തിയശേഷം ഇയാള്‍ രക്ഷപ്പെടാന്‍ നോക്കിയെങ്കിലും പോലീസ് പിടികൂടി.
എച്ച്എംടി കോളനി സ്വദേശിയാണ് വിഷ്ണു. എസ്‌ഐ ഗിരീഷ് കുമാറിന് കുത്തേറ്റത്. കൈത്തണ്ടയില്‍ പരിക്കേറ്റ് ചികിത്സയിലായിരുന്ന എഎസ്‌ഐ ആശുപത്രി വിട്ടു. വധശ്രമത്തിനും കൃത്യനിര്‍വഹണം തടസ്സപ്പെടുത്തിയതിനും കേസെടുത്ത് പ്രതിയെ റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: