തിരുവനന്തപുരം: എട്ടുവയസുകാരിയെ പീഡിപ്പിച്ച കേസില്‍ പ്രതിക്ക് ഒമ്പതുവര്‍ഷം കഠിനതടവും മുപ്പതിനായിരം രൂപ പിഴയും. തിരുവനന്തപുരം അതിവേഗ സ്‌പെഷ്യല്‍ കോടതിയാണ് ശിക്ഷ വിധിച്ചത്. കുടപ്പനക്കുന്ന് ഏണിക്കര ലെയിനില്‍ സുരേഷിനെയാണ് ജഡ്ജി ആര്‍. ജയകൃഷ്ണന്‍ ശിക്ഷിച്ചത്. പിഴത്തുക അടച്ചില്ലെങ്കില്‍ ഒമ്പതുമാസം കൂടുതല്‍ ശിക്ഷ അനുഭവിക്കണം. പിഴത്തുക ലഭിച്ചാല്‍ പീഡനത്തിനിരയായ പെണ്‍കുട്ടിക്ക് നല്‍കണം.
2015 ഫെബ്രുവരി 16 രാത്രി 7.30നാണ് കേസിനാസ്പദമായ സംഭവം നടന്നത്. പെണ്‍കുട്ടി താമസിക്കുന്ന വീടിന്റെ താഴത്തെ നിലയില്‍ പ്രതിയുടെ ബന്ധുവാണ് താമസിക്കുന്നത്. വൈദ്യുതിബില്‍ വന്നെങ്കില്‍ വാങ്ങി കൊണ്ടുവരാന്‍ പെണ്‍കുട്ടിയെ താഴത്തെ നിലയിലേക്ക് അയയ്‌ക്കുകയായിരുന്നു.
ഈ സമയം പ്രതി മാത്രമാണ് വീട്ടിലുണ്ടായിരുന്നത്. പ്രതി മൂകനും ബധിരനുമാണ്. പ്രതി കുട്ടിയെ എടുത്ത് അകത്തുള്ള മുറിയില്‍ കൊണ്ട് പോയി തന്റെ സ്വകാര്യഭാഗങ്ങള്‍ കുട്ടിയെ കാണിക്കുകയും കുട്ടിയുടെ അടിവസ്ത്രം ഊരുകയും ശരീരത്തില്‍ പിടിക്കുകയും ചെയ്തു. കുട്ടി ഓടി രക്ഷപ്പെടാന്‍ ശ്രമിച്ചെങ്കിലും പ്രതി വിട്ടില്ല. തുടര്‍ന്ന് കുട്ടി ബഹളം വച്ച് പ്രതിയെ തള്ളി മാറ്റി ഓടി രക്ഷപ്പെടുകയായിരുന്നു.
വീട്ടുകാര്‍ പോലീസില്‍ അറിയിച്ചതിനെ തുടര്‍ന്ന് പ്രതിയെ പോലീസ് അറസ്റ്റ് ചെയ്യുകയായിരുന്നു. പ്രതി സംഭവസമയം ധരിച്ചിരുന്ന വസ്ത്രങ്ങള്‍ പോലീസ് കണ്ടെടുത്ത് ശാസ്ത്രീയ പരിശോധനയക്ക് അയച്ചു. ഈ വസ്ത്രത്തില്‍ ബീജത്തിന്റെ അംശം കണ്ടെത്തിയിരുന്നു. പ്രോസിക്യൂഷന് വേണ്ടി സ്‌പെഷ്യല്‍ പബ്ലിക്ക് പ്രോസിക്യൂട്ടര്‍ ആര്‍.എസ്.വിജയ് മോഹന്‍ ഹാജരായി. പേരൂര്‍ക്കട എസ്‌ഐയായിരുന്ന വി. സൈജുനാഥാണ് കേസ് അന്വേഷിച്ചത്. സര്‍ക്കാര്‍ കുട്ടിക്ക് നഷ്ടപരിഹാരം നല്‍കണമെന്ന് വിധിയില്‍ പ്രതിപാദിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: