കൊച്ചി : അന്തരിച്ച തൃക്കാക്കര എംഎല്എ പി.ടി. തോമസിന്റെ സംസ്കാരം ഇന്ന്. മൃതദേഹം രാവിലെ നാരലരയോടെ ഇടുക്കി ഉപ്പുതോട്ടിലെ വീട്ടിലെത്തിച്ചശേഷം വിലാപയാത്രയായി തൊടുപുഴയിലേക്ക കൊണ്ടുപോകാന് ആരംഭിച്ചു. പ്രിയപ്പെട്ട നേതാവിന് ആദരാഞ്ജലികള് അര്പ്പിക്കാന് വീട്ടിലും വഴിയോരത്തുമായി ആയിരങ്ങളാണ് കാത്തിരുന്നത്.
വെല്ലൂര് ക്രിസ്ത്യന് മെഡിക്കല് കോളേജില് ചികിത്സയിലിരിക്കേയണ് പി.ടി. തോമസ് മരണമടഞ്ഞത്. ജില്ലാ കളക്ടറും ഇടുക്കി എം.പി. ഡീന് കുര്യാക്കോസും ചേര്ന്ന് പുലര്ച്ചെയാണ് വെല്ലൂരിലെ ആശുപത്രിയില് നിന്ന് കേരളത്തിലേക്ക് കൊണ്ടുവന്ന പി.ടി.തോമസിന്റെ മൃതദേഹം സംസ്ഥാന അതിര്ത്തിയില് ഏറ്റുവാങ്ങിയത്.
പുലര്ച്ചെ 2.45 ഓടെ ഇടുക്കിയിലെത്തിച്ച മൃതദേഹം ഉപ്പുതോട്ടത്തിലെ വീട്ടില് പൊതുദര്ശനത്തിന് വെച്ചു. പാലാ, ഇടുക്കി ബിഷപ്പുമാര് പി.ടിയുടെ വീട്ടിലെത്തി ആദരാഞ്ജലി അര്പ്പിച്ചു. തൊടുപുഴയില് രാജീവ് ഭവനില് പൊതുജനങ്ങള്ക്ക് ആദരാഞ്ജലി അര്പ്പിക്കാന് സൗകര്യമൊരുക്കും. തുടര്ന്ന് എറണാകുളം ഡിസിസി ഓഫീസിലെത്തിച്ചശേഷം മൃതദേഹം എറണാകുളം ടൗണ് ഹാളിലെത്തിക്കുന്ന മൃതദേഹത്തില് രാഹുല് ഗാന്ധി ഉള്പ്പടെയുള്ള പ്രധാന നേതാക്കളെത്തി അന്തിമ ഉപചാരം അര്പ്പിക്കും. ഉച്ചയോടെ തൃക്കാക്കര കമ്മ്യൂണിറ്റി ഹാളിലെത്തിക്കുന്ന മൃതദേഹത്തില് പി.ടി. തോമസിന്റെ പ്രിയപ്പെട്ട വോട്ടര്മാര് യാത്രമൊഴി നല്കും. പിടിയുടെ ആഗ്രഹപ്രകാരം മതപരമായ ചടങ്ങുകള് ഒഴിവാക്കി 5.30ന് എറണാകുളം രവിപുരം ശ്മശാനത്തില് ആണ് സംസ്കാരചടങ്ങുകള് നടത്തുക.
നട്ടെല്ലിനെ ബാധിച്ച അര്ബുദത്തിനുള്ള ചികിത്സയ്ക്കായി കഴിഞ്ഞ മാസമാണ് പി.ടി. തോമസ് വെല്ലൂരിലെ ആശുപത്രിയില് എത്തിയത്. ബുധനാഴ്ച രാവിലെ പത്ത് മണിയോടെ പി.ടി. തോമസ് മരണത്തിന് കീഴടങ്ങുകയായിരുന്നു. 71 വയസ്സായിരുന്നു. കോണ്ഗ്രസ് നേതൃനിരയില് എല്ലാം കൊണ്ട് വേറിട്ട നേതാവായിരുന്നു പിടി തോമസ്. തൊടുപുഴയില് കര്ഷക കുടുംബത്തില് ജനിച്ച് കോണ്ഗ്രസ് പാര്ട്ടിയുടെ നേതൃനിരയിലേക്ക് ഉയര്ന്നു വന്നതാണ് അദ്ദേഹം.
താഴെത്തട്ടിലെ പ്രവര്ത്തകരുമായി സാധാരണക്കാരുമായും അടുത്ത ബന്ധം പിടി പുലര്ത്തി. ഏത് നേരത്തും അണികളുടെ ഏത് ആവശ്യത്തിനും സമീപിക്കാന് സാധിക്കുന്ന പ്രിയങ്കരനായ നേതാവ് എന്ന നിലയിലാണ് പിടിയെ അണികള് ചേര്ത്തു പിടിച്ചത്. ഭാര്യ: ഉമ തോമസ്, മക്കള്: വിഷ്ണു തോമസ്, വിവേക് തോമസ്.
