ഗുരുവായൂര്‍: നാളെ നടക്കുന്ന ഗുരുവായൂര്‍ ഏകാദശി ആഘോഷങ്ങള്‍ക്കൊരുങ്ങി ഗുരുവായൂര്‍. ദശമി, ഏകാദശി, ദ്വാദശി ദിവസങ്ങളില്‍ ഭക്തര്‍ക്ക് ക്ഷേത്രദര്‍ശനത്തിനുള്ള എല്ലാ ഒരുക്കങ്ങളും പൂര്‍ത്തിയായതായി ദേവസ്വം അഡ്മിനിസ്ട്രേറ്റര്‍ വാര്‍ത്താക്കുറിപ്പിലൂടെ അറിയിച്ചു. ഇന്ന് നടക്കുന്ന ഗജരാജന്‍ കേശവന്‍ അനുസ്മരണം, നാരായണീയ ദിനാഘോഷം, നാളെ നടക്കുന്ന ചെമ്പൈ സംഗീതോത്സവ സമാപനം തുടങ്ങിയവയ്‌ക്കുള്ള തയ്യാറെടുപ്പുകളും പൂര്‍ത്തിയായി.
ഏകാദശി ദിവസം രാവിലെ ആറ് മുതല്‍ മുതല്‍ ഉച്ചയ്‌ക്ക് രണ്ട് വരെ ഓണ്‍ലൈന്‍ ബുക്കിങ് നടത്തിയവര്‍ക്ക് മാത്രമാകും ദര്‍ശനാനുമതി. അതേസമയം, നെയ് വിളക്ക് ശീട്ടാക്കിയവര്‍ക്ക് തത്സമയം ദര്‍ശനം അനുവദിക്കും. രണ്ടിന് ശേഷം മറ്റുള്ളവര്‍ക്കും ദര്‍ശനം അനുവദിക്കും. ദശമി ദിനമായ ഇന്ന് പുലര്‍ച്ചെ മൂന്നിന് ക്ഷേത്രനട തുറന്നാല്‍, ദ്വാദശി ദിവസമായ ബുധനാഴ്ച രാവിലെ ഒമ്പത്‌വരെ നട തുറന്നിരിക്കും. പതിവ് പൂജ, ദീപാരാധന ചടങ്ങുകള്‍ക്ക് മാത്രമാകും നട അടയ്‌ക്കുക.
ഏകാദശി ദിവസം ക്ഷേത്രത്തിലെത്തുന്ന എല്ലാ ഭക്തര്‍ക്കും പ്രസാദ ഊട്ടിനായി കൂടുതല്‍ സൗകര്യങ്ങള്‍ ഏര്‍പ്പെടുത്തും. അന്നലക്ഷ്മി ഹാള്‍, കൂടാതെ തെക്കേ നടപന്തലിനു പടിഞ്ഞാറുഭാഗത്ത് നിര്‍മിച്ച പുതിയ പന്തലിലും പ്രസാദ ഊട്ട് നടത്തും. രാവിലെ ഒമ്പത് മുതല്‍ പ്രസാദ ഊട്ട് ആരംഭിച്ചു. ഏകാദശി തിരക്ക് പ്രമാണിച്ച് ദേവസ്വം ഇന്നര്‍ റിങ്ങ് റോഡില്‍ ഇരുചക്ര വാഹനങ്ങള്‍ ഉള്‍പ്പെടെ പാര്‍ക്കിങ് അനുവദിക്കില്ല. ഇരുചക്ര വാഹനങ്ങള്‍ക്ക് പാര്‍ക്കിങ്ങിന് ക്രമികരണം ഏര്‍പ്പെടുത്താന്‍ ഗുരുവായൂര്‍ ടെമ്പിള്‍ പോലീസിനെയും ദേവസ്വം ഹെല്‍ത്ത് വിഭാഗത്തെയും ചുമതലപ്പെടുത്തി.
അവലോകന യോഗത്തില്‍ ദേവസ്വം ചെയര്‍മാന്‍ അഡ്വ. കെ.ബി. മോഹന്‍ദാസ്, ഭരണസമിതി അംഗങ്ങള്‍, ദേവസ്വം അഡ്മിനിസ്ടേറ്റര്‍ കെ.പി. വിനയന്‍, ക്ഷേത്രം ഡെപ്യുട്ടി അഡ്മിനിസ്ട്രേറ്റര്‍ പി. മനോജ് കുമാര്‍, ഗുരുവായൂര്‍ അസി. പോലീസ് കമ്മീഷണര്‍ കെ.ജി. സുരേഷ്, ടെമ്പിള്‍ സി.ഐ. സി. പ്രേമാനന്ദകൃഷ്ണന്‍, എസ്‌ഐ പി.ആര്‍. സുബ്രഹ്മണ്യന്‍ എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: