തൃശൂര്: സെന്റ് മേരീസ് കോളജിലെ നാല് വിദ്യാര്ത്ഥികള്ക്ക് കൂടി നോറോ വൈറസ് ബാധിച്ചു. ഇതോടെ കോളേജ് ഹോസ്റ്റലില് നോറോ വൈറസ് ബാധിച്ച വിദ്യാര്ത്ഥികളുടെ എണ്ണം അറുപതായി. ഈ മാസം ആദ്യം മുതല് വിദ്യാര്ത്ഥികളില് അസുഖ ബാധ കണ്ടെങ്കിലും അവരെല്ലാം സ്വകാര്യ ചികിത്സ തേടുകയായിരുന്നു. എന്നാല് അവരില് 7 പേര് തൃശൂര് ജനറല് ആശുപത്രിയില് പ്രവേശിപ്പിക്കപ്പെട്ടതോടെയാണ് നോറോ ബാധ കണ്ടെത്തിയത്. ആലപ്പുഴ വൈറോളജി ലാബില് നടത്തിയ പരിശോധനയിലൂടെയാണ് നോറോ വൈറസ് ബാധ സ്ഥിരീകരിച്ചത്.
ഹോസ്റ്റലിലെ മലിനമായ വെള്ളമാണ് രോഗത്തിന് കാരണമെന്ന് നേരത്തെ ആരോഗ്യ വകുപ്പ് കണ്ടെത്തിയിരുന്നു. പ്രദേശത്തെ കിണറുകള് ഉള്പ്പെടെ മറ്റു ജലസ്രോതസ്സുകളില് ശുചീകരണം തുടരുകയാണ്. ഹോസ്റ്റലുകളിലും ആളുകള് ഒരുമിച്ച് താമസിക്കുന്ന ഇടങ്ങളിലും ജാഗ്രത നിര്ദേശം നല്കുമെന്ന് ആരോഗ്യ വകുപ്പ് അറിയിച്ചു. കോളേജിലെ കാന്റീനും ആരോഗ്യവകുപ്പ് ഇടപെട്ട് അടപ്പിച്ചു. രോഗം പടരാതിരിക്കാനുള്ള നടപടികള് സ്വീകരിച്ചു വരുന്നതായി ആരോഗ്യ വകുപ്പ് വ്യക്തമാക്കി.
വൈറസ് ബാധ പകരാതിരിക്കാന് വിദ്യാര്ത്ഥികളുമായി സമ്പര്ക്കത്തിലുണ്ടായിരുന്ന 25 ഓളം മറ്റു വിദ്യാര്ത്ഥികളെ ഐസൊലേറ്റ് ചെയ്തിട്ടുണ്ട്. കോളേജില് നിന്ന് മറ്റ് ജില്ലകളിലേക്ക് പോയ വിദ്യാര്ത്ഥികളോട് ശുചിത്വം പാലിക്കാന് പ്രത്യേക നിര്ദേശം നല്കി. അതാത് ജില്ലകളിലെ ഡിഎംഓ മാരേയും വിവരം അറിയിച്ചിട്ടുണ്ട്. പരിശോധനക്കായി കൂടുതല് സാന്പിളുകള് ആലപ്പുഴയിലെ വൈറേളജി ലാബിലേക്ക് അയച്ചിട്ടുണ്ട്. ഇതിന്റെ ഫലത്തിനായി കാത്തിരിക്കുകയാണ്. ജില്ലയിലെ മറ്റു ഹോസ്റ്റലുകളിലും ജാഗ്രത നിര്ദേശം നല്കുമെന്നും അധികൃതര് വ്യക്തമാക്കി. നിലവില് ആശങ്കപ്പെടേണ്ട സാഹചര്യമില്ലെന്നാണ് ആരോഗ്യവകുപ്പിന്റെ വിലയിരുത്തല്.
വെറ്ററിനറി കോളേജിന്റെ വനിതാ ഹോസ്റ്റലിലെ വിദ്യാര്ത്ഥികള്ക്കിടയില് വയറിളക്കവും, ഛര്ദ്ദിയും റിപ്പോര്ട്ട് ചെയ്തതിനെ തുടര്ന്ന് ആരോഗ്യ വകുപ്പിന്റെ നേത്യത്വത്തില് വിദഗ്ദ സംഘം പരിശോധന നടത്തി സാംപിള് ശേഖരിച്ചത്. വയറിളക്കം, വയറുവേദന, ഛര്ദ്ദി, പനി, തലവേദന, ശരീരവേദന തുടങ്ങിയവയാണ് നോറോ വൈറസ് രോഗ ലക്ഷണങ്ങള്. മലിനമായ ജലത്തിലൂടെയും, ഭക്ഷണത്തിലൂടെയുമാണ് ഇത് പകരുന്നത്. 3 ദിവസങ്ങള്ക്കുള്ളില് തന്നെ രോഗലക്ഷണങ്ങള് മാറാം. എന്നാല് കൃത്യമായ വിശ്രമവും പരിചരണവും കിട്ടിയില്ലെങ്കില് രോഗം ഗുരുതരമായി മരണം സംഭവിക്കാനും സാധ്യതയുണ്ട്.
