ന്യൂദല്ഹി: നൂതന മത്സ്യകൃഷിയിലൂടെ സ്വയംസംരംഭകരാകാന് പട്ടികജാതി കുടുംബങ്ങള്ക്ക് പിന്തുണയുമായി കേന്ദ്ര സമുദ്രമത്സ്യ ഗവേഷണ സ്ഥാപനം (സിഎംഎഫ്ആര്ഐ). സിഎംഎഫ്ആര്ഐയുടെ ഷെഡ്യൂള്ഡ് കാസ്റ്റ് സബ് പ്ലാന് പദ്ധതിയുടെ ഗുണഭോക്താക്കളായി ചേരാനെല്ലൂരിലെ പട്ടികജാതി വിഭാഗത്തില്പെട്ട അഞ്ച് കുടുംബങ്ങളാണ് നൂതന മത്സ്യകൃഷിരീതിയായ ബയോഫ്ളോക് കൃഷിക്ക് തുടക്കമിട്ടത്.
മറ്റ് മത്സ്യകൃഷി രീതികളെ അപേക്ഷിച്ച് ജലത്തിന്റെ ഉപയോഗം വളരെ കുറച്ച് മാത്രം ആവശ്യമായി വരുന്ന ഈ രീതിയില് 1800 ഗിഫ്റ്റ് തിലാപിയയാണ് കൃഷി ചെയ്യുന്നത്. എട്ട് മാസം നീണ്ട് നില്ക്കുന്ന കൃഷിയില് നിന്നും ചുരുങ്ങിയത് 1.35 ലക്ഷം രൂപ വരുമാനമാണ് ലക്ഷ്യമിടുന്നത്. ഒരു മീനിന് 300 ഗ്രാം തൂക്കം ലഭിച്ചാല് തന്നെ മികച്ച വരുമാനം നേടാനാകും. സാധാരണഗതിയില് ഇക്കാലയളവില് ബയോഫ്ളോക്ക് കൃഷിയിലൂടെ ഗിഫ്റ്റ് തിലാപ്പിയക്ക് 500 ഗ്രാം വരെ തൂക്കം ലഭിക്കും.
ഉയര്ന്ന അളവില് കുഞ്ഞുങ്ങളെ നിക്ഷേപിച്ച് മീനുകള്ക്ക് ഗുണകരമായരീതിയില് മികച്ചയിനം ബാക്റ്റീരിയകളെ ഉപയോഗപ്പെടുത്തി നിയന്ത്രിത സാഹചര്യത്തിലുള്ള കൃഷിരീതിയാണിത്. തീറ്റയുടെ അളവും താരതമ്യേന കുറവാണ്. ജലാശയങ്ങളും കുളങ്ങളും ലഭ്യമല്ലാത്തവര്ക്ക് വീട്ടുവളപ്പില് തന്നെ ബയോഫ്ളോക് ജലസംഭരണി നിര്മിച്ച് ചെയ്യാവുന്ന മത്സ്യകൃഷിയാണിത്.
മീനുകളുടെ വളര്ച്ച ത്വരിതപ്പെടുത്തുന്ന രീതിയില് വിവിധ സൗകര്യങ്ങളോടെ നിര്മ്മിച്ച ടാങ്ക്, അനുബന്ധ സൗകര്യങ്ങള്, മത്സ്യക്കുഞ്ഞുങ്ങള്, മത്സ്യത്തീറ്റ തുടങ്ങിയവ സിഎംഎഫ്ആര്ഐയുടെ പദ്ധതിയില് കുടുംബങ്ങള്ക്ക് നല്കി. അഞ്ച് മീറ്റര് വ്യാസവും 1.20 മീറ്റര് ഉയരവുമുള്ള ടാങ്കില് 23,500 ലിറ്റര് വെള്ളം ഉള്ക്കൊള്ളും. കൃഷിയുടെ ഓരോ ഘട്ടവും സിഎംഎഫ്ആര്ഐയിലെ ഗവേഷണ സംഘം കൃത്യമായി നിരീക്ഷിക്കും. വെള്ളത്തിന്റെ ഗുണനിലവാരം നിലനിര്ത്തുന്നതിനായി ജലഗുണനിലവാര കിറ്റും സിഎംഎഫ്ആര്ഐ കര്ഷകര്ക്ക് നല്കിയിട്ടുണ്ട്.
ഷെഡ്യൂള്ഡ് കാസ്റ്റ് സബ് പ്ലാന് പദ്ധതിക്ക് കീഴിലായി പട്ടികജാതി കുടുംബങ്ങള്ക്ക് കൂടുമത്സ്യ കൃഷി നടത്താന് സിഎംഎഫ്ആര്ഐ നേരത്തെ തന്നെ സഹായം നല്കി വരുന്നുണ്ട്. എന്നാല്, അതിനാവശ്യമായ ജലാശയ സൗകര്യങ്ങള് ലഭ്യമല്ലാത്തവരിലേക്കും ഈ പദ്ധതിയുടെ ഗുണഫലമെത്തിക്കാന് വേണ്ടിയാണ് വീട്ടുവളപ്പില് തന്നെ നടത്താവുന്ന ബയോഫ്ളോക് മത്സ്യകൃഷി ഉപയോഗപ്പെടുത്തുന്നത്. എറണാകുളം ജില്ലക്ക് പുറമെ, പാലക്കാട്, തൃശൂര്, ഇടുക്കി, കോട്ടയം, കൊല്ലം ജില്ലകളിലും സിഎംഎഫ്ആര്ഐയുടെ നേതൃത്വത്തില് ബയോഫ്ളോക് മത്സ്യകൃഷികള് നടന്നുവരുന്നുണ്ട്. ഡോ കെ മധുവിന്റെ നേതൃത്വത്തിലാണ് പദ്ധതി നടപ്പിലാക്കി വരുന്നത്.
