പാലക്കാട് : ബിജെപി സംസ്ഥാന വക്താവ് സന്ദീപ് വാര്യരുടെ വീട്ടില്‍ അതിക്രമിച്ച് കയറിയ ആള്‍ പിടിയില്‍. പള്ളിക്കുന്ന് ആലിപ്പറമ്പ് സ്വദേശി യൂസഫാണ് പോലീസ് പിടിയിലായത്. സന്ദീപിന്റെ ചെത്തല്ലൂരിലെ വീട്ടിലാണ് ഇയാള്‍ അതിക്രമിച്ച് കയറിയത്.
ഇയാളുടെ സിസിടിവി ദൃശ്യങ്ങള്‍ സന്ദീപ് വാര്യര്‍ തന്നെ കഴിഞ്ഞ ദിവസം പുറത്തുവിട്ടിരുന്നു. റബ്ബര്‍ ഷീറ്റ് മോഷ്ടിക്കുന്നതിനായാണ് ഇയാള്‍ വീട്ടില്‍ കയറിയതെന്നാണ് പോലീസ് വൃത്തങ്ങള്‍ പറയുന്നത്. തുടര്‍ന്ന് പോലീസ് പെട്രോളിങ് വാഹനം കണ്ട് പേടിച്ച യൂസഫ് മോഷണശ്രമം ഉപേക്ഷിക്കുകയായിരുന്നു.
തന്റെ വീട്ടില്‍ കള്ളന്‍ കയറിയതായി ഈ മാസം 21നാണ് സന്ദീപ് വാര്യര്‍ ഫേസ്ബുക്ക് പോസ്റ്റിലൂടെ അറിയിച്ചത്. ‘ഇന്ന് പുലര്‍ച്ചെ പ്രായമായ അച്ഛനും അമ്മയും താമസിക്കുന്ന ചെത്തല്ലൂരിലെ വീട്ടില്‍ അതിക്രമിച്ച് കയറിയ അപരിചതന്റെ ദൃശ്യങ്ങള്‍ സിസിടിവിയില്‍ ലഭിച്ചു. വധഭീഷണി ഉയര്‍ന്ന സാഹചര്യത്തില്‍ ഇതു സംബന്ധിച്ച് അന്വേഷിക്കണമെന്ന് ആവശ്യപ്പെട്ട് അച്ഛന്‍ പോലീസില്‍ പരാതി നല്‍കിയിട്ടുണ്ട്. എന്നായിരുന്നു ഫേസ്ബുക്ക് പോസ്റ്റ്. തുടര്‍ന്ന് നാട്ടുകല്‍ പോലീസ് നടത്തിയ അന്വേഷണത്തിലാണ് ഇയാള്‍ പിടിയിലായത്.
പ്രതികരിക്കാൻ ഇവിടെ എഴുതുക: